TURA: Adita salrangna skang, Shillong-ni MBOSE guest house-o kam ka·gipa mandeko kragija dake dokanina matnangako man·ani ja·man da·oba changsataie, Gambegre by-election-na campaign ka·engmiting somoio, manderangko salna gita ua baditaba sak manderangna skigipani kamrangko man·e on·aha ine a·kangtaiahani gimin Rangsakona-ni NPP MLA Subir Marak-ko social activist saksa Cherian Momin matnangattaiaha.
Momin-ni parakatani gitade, social media-rango watjojoenggipa video-oniko ia MLA-ni, baditaba sak manderangna skigipani kamko man·e on·aha ine a·kanganiko nikna man·ahachim.
“Uni kamrangko man·e on·anina uko mittelpilna krae niknaba gnang indiba iako name nigenchimode ian uni mikkang niteani aro ku·mitdu ra·aniko mesokanisa ong·enga. Skanggipao uni kamara bil mesokaniko aro gnigipao ia kamrangko on·anio daksrukaniko mesokanisa ong·aha,” ine Cherian Momin parakataha.
Gambegre by-election-na campaign ka·engmiting somoio iandake manderangna parake on·ahani gimin matnangatengon, “Kamrangko on·na gita sawa una bilko on·aha? Seokako man·gipa MLA ong·e uni iandake a·kanganiara an·tangni man·gnina uni bil jakkalsretaniko mesokanisa ong·aha,” ine Momin parakataha.
Rangsakona MLA-ni iandake kamrangko man·e on·a ine a·kanganiara kamna seokanio kakket ong·gijaniko aro dongnue dakaniko mesokaniba ong·aha ine janapatskaengon, “MLA-ni a·kangani gita ia kamrangkoa uni ma·sigiparangna ba politics-o bak donggiparangnasa on·ahama? Ian ong·bebegenchimode lekka porako on·anio namgniko chanchiani donggijaniko mesokanisan ong·aigija iandakgipa kamrangna an·tangtangko tarienggipa chadamberangni ka·donganiko bon·atani gitaba ong·enga,” ine Momin parakataha.
Momin-ni parakatani gitade, ia video-o Rangsakona-ni MLA Subir Marak, sak 25 manderangna skigipani kamko aro ja·mano gipin sak 28 manderangna kamrangko man·e on·aha ine a·kangahachim.
Iani bidingo sandirokna gita dabichina ua pilak NGO-rangko aro Garo Hills-o songdongenggipa manderangkoba didiataha.