SHILLONG: Meghalaya a·doko drugs ba pekatgipa samrangko jakkalenggipa manderang lak 3-mang gapaha aro 2021-2022 bilsina National Action Plan for Drug Demand Reduction (NAPDDR)-ni ning·o gong 1,30,000-kosan man·soengkua ine Mongolbar salo, a·dokni Social Welfare Minister Paul Lyngdoh-ni parakatani ja·man Assembly-ni Opposition MLA-rang, iani bidingo a·dok sorkariko sing·doangtokaha.
Assembly-ni Autumn Session-o Mawryngkneng MLA Heaving Stone Kharpran-ni sing·anina iako Minister parakatani ja·man, Opposition MLA-rang suk ong·gijaniko paraktokaha.
Minister-ni parakatani ja·man Nongkrem-ni VPP MLA Ardent Basaiawmoit-ba an·tangni suk ong·gijaniko parakatengkon, a·doko iandake pekatgipa samrangko jakkalanirang batroroenganiara namen jajrengna nangani ong·enga ine aganaha.
“Minister-ni aganchakaniko on·ani gitade, a·doko drugs jakkalgiparang da·o lak 3-mang ong·aha aro ian jajrengna nangani ong·engaha. Re·anggipa bilsioba an·ching iani bidingon Assembly-o chanchirimahachim aro ua somoio drugs jakkalgiparang lak 2 ong·kuengachim. Da·o bilsisani gisepon lak 3 gapaniara namen jajrengna nangani ong·engaha,” ine Basaiawmoit aganaha.
Meghalaya a·doko drugs jakkalaniko champengna on·enggipa tangka paisarangara namen komia ine janapatengon, ia program-ni ning·o tangka paisarangko bang·bate chamatchina sorkari bi·ahachimma ine Basaiawmoit sing·doangaha.
VPP MLA-ni aganani gitade, NAPDDR-ni ning·o Manipur a·dokde, 2021 bilsio gong kror 6.34-ko, 2021-2022 bilsio gong kror 7.2-ko aro 2022-23 bilsioba gong kror 7.63-ko man·soahachim.
Iani bidingo aganchakaniko on·angskaengon, ma·mongo da·o gital sorkari jako ra·daldalsa ong·kuenga aro uamang ministry-oniko tangka paisarangko bi·dapatna jotton ka·enga ine Social Welfare Minister parakataha.
Ma·mongo apsan sorkarian chalaiengoba minister-rangde gital ong·a ineba ua aganaha.
Autumn Session matchotani ja·man ua iani bidingo ma·mongni minister in-charge baksa golpoatgen ineba Lyngdoh parakataha.
A·doko drugs jakkalaniko warachakna gita ma·mong sorkarini on·atenggipa tangka paisarang baksana a·dok sorkarini a·bachengatgipa DREAM program-ni ning·o da·o bilsi bongana gong kror 50 tangkarangko chamaha ineba Lyngdoh aganaha.
Meghalaya a·doko drugs jakkalaniko 20 percent-chi warachakna man·aha ine sorkarini a·kanganiko gisik ra·atpilengon, “Mai dakgipa survey-ko ka·e sorkari indake ma·sina man·aha?” ine Nongkrem MLA sing·doangaha.