SHILLONG: Congress dolko wate katgimin dilgiparang, doltangona re·bapilna sikgenchimode, constituency-tangtangni manderang baksa agangrikchengesa aro sing·cheng sanchengesa iandakgipa dilgiparangko Congress dolo rimnaptaipilgen ine Sombar salo, Meghalaya a·dokni saksakamkam Congress MLA Ronnie V Lyngdoh parakataha.
“Chingko wate katgimin dilgiparang re·bapilna sikenga ong·ode chinga uamangni constituency-rangona re·ange, uamang baksa agangrikchenggen aro uamang nangnikgenchimosa chinga gitcham dilgiparangko rimnaptaipilgen. Congress-o block aro district level-ni unit-rang donga aro chinga uamang pilak baksa agangrikchenggen. Uamang kusi ong·genchimosa chinga wate katgipa dilgiparangko Congress dolona rimnaptaipilgen,” ine Lyngdoh aganaha.
Wate katani ja·manoba iandakgipa dilgiparangko rimnappilna kusi ong·aigenma ine sing·anina aganchakaniko on·angskaengon, “Chinga obostarangko name nichenggen aro uamangna cholrangko on·e nipiltaigen,” ine ua aganaha.
Meghalaya a·doko Congress dolko tangatpiltaiani gimin janapatengon, “Jensalo badiaba party bilo ong·jahaon party-ni manderang, bilgrie nikna a·bachengronga indiba da·o Congress dol, a·songni gadangoba bilakbapiltaiengaha aro seat-rangkoba bang·bate man·piltaiengaha. Ian party-ko wate katgiparangna aro re·bapilna sikenggipa manderangna didiani ong·gen,” ine Congress MLA aganaha.
Lyngdoh-ni aganani gitade, uamang gital dilgiparangkoba sandienga aro skia pora donggipa chadamberangba Congress dolo napna gita uamang baksa agangrikeaha.
“Rahul Gandhi-ni Bharat Jodo Yatra-o ua a·song gimikonan wenangaha aro a·songo ong·enggipa obostarangko ma·sie ra·na gita pilak gadangni manderang baksaba agangrikaha. Chinga chadamberangko Congress dolona rimbana nangnikenga,” ine Lyngdoh aganaha.
Party-ko wate katgipa manderang re·bapilna sikgenchimode uamang Congress dolni do·gako oe donaigen aro a·songni manderangna dangdike on·na gita cholrangko on·gen ineba ua aganaha.
 |
ReplyForward
|