TURA: Garo Hills-o skanggipa changna Coffee Growers ba coffee game cha·enggipa manderang baksa Profit Sharing ba lap sualgrikani program-ko Budbar salo, West Garo Hills a·jani Oragitok songo ong·atangaha.
Ia program-ko Babadam-o donggipa All Garo Hills Multi Purpose Cooperative Society (AGHMPCS), Durama MPCS baksa nangrime ong·ataha aro ia program-ko ong·atanio MBMA aro Tura-ni Coffee Board-ba dakchake on·aha.
Ia program-ko ong·atanio, West Garo Hills a·jani Deputy Commissioner Jagdish Chelani, mongsonggipa sokgipa ong·e jinmana aganprakangengon, coffee game cha·enggiparangni gisepo ian skanggipa changna apsan chanchirimna aro laprangko sualgrikna gita ong·atenggipa program ong·a aro ua an·tangde ia jolrango coffee man·a ine ma·sijachim ine parakataha.
Ia jolrangoniko kg 12,000 coffee-rangko gipin biaprangona ra·anganiara ia jolrango kraa gitan coffee ge·ani aro man·aniko mesokani ong·enga ineba ua aganaha. An·tangni bil ama gita ua coffee ge·giparangna pilak nanga dakchakanirangko on·na kusi ong·aigen ineba Deputy Commissioner ku·rachakaniko on·angaha.
Ia tom·anio AGHMPCS-ni Director Rev Fr Sunny Mavelil-ba dongpae jinmana aganprakangengon, a·dok sorkarini tangka paisarangko dakchake on·anichi ia AGHMPCS-ba cooperative society gita chalaina man·enga aro ia jolrang songdongenggipa manderangni janggi tangani gadangko namdapatna man·enga ine parakataha.
Durama MPCS-ko 2022 bilsio kuliaha ine parakatengon, uamang ia jolrango ge·gipa kg 1200 coffee-rangko bree Shillong-o paleahachim indiba coffee-rang namgipa ong·jani a·sel inditana laprangko man·jaha ine Rev Mavelil aganaha.
Iana skangde, ia jolrango coffee ge·e cha·giparang, gong 15-20-mangnasan palaiachim ine janapatskaengon, ia jolrango ge·gipa coffee-rangko palani ja·man da·o ia jolrango coffee ge·e cha·giparangna laprangko suale on·na man·engaha ine AGHMPCS-ni Director parakataha.
Ia program-ko ong·atanio, Tura Coffee Board-ni official Md Sun Muhamad Ali aro gipinrangba dongpae bak ra·angaha.
Ja·mano, coffee ge·giparangna West Garo Hills a·jani Deputy Commissioner Jagdish Chelani, coffee pale man·ani laprangko suale on·angaha.
