TURA: South Garo Hills a·jani Meghalaya Basin Development Agency (MBDA)-ni ning·o bilsi gittamna jako ra·e ka·gipa kamrangni bidingo RTI ka·anina aganchakaniko on·chipkuja ine ia office-ni Public Information Officer (PIO)-ni kosako South Garo Hills a·jani social activist Greneth M Sangma, a·dokni Chief Information Commissioner (CIC)-na badi ka·doangaha.
Sangma-ni badi ka·doangani gitade, ua ia bilsini July 24 tarikon RTI application-ko ia office-ni PIO-na on·atahachim aro August-ni 29 tarikoba ua iani bidingon office-ona re·ange sing·sandianirangko dakahachim.
Indake ong·genchimoba uni sing·anirangna PIO maming aganchakanirangko on·chipjaha aro da·alonan maming u·iatanirang dongkujaenga ine Sangma, CIC-na sedoatgipa chittio parakataha.
Sal 30-ni gisepo uni sing·anirangna PIO-ni aganchakanirangko on·janiara RTI Act 2005-o dongimin niamrangko pe·ani gita ong·aha ine janapatengon, uni sing·anirangna ta·raken aganchakaniko on·na gita ia PIO-na ge·etaniko on·china aro RTI Act 2005-ni Section 20(1)-o pangchake, dorgastoko man·soaoni salprako gong 250/- ka·e daiko gamatchina gita Sangma, CIC-ko didiataha.