SHILLONG: Adita jarangni gisepo ong·atna sienggipa Gambegre Assembly Constituency-ni by-election-o Bharatiya Janata Party (BJP)-ba susagen aro ia by-election-o susana gita nambatgipa candidate-ko sandikuenga ine BJP-ni dilgipa aro a·dokni Cabinet Minister AL Hek parakataha.
BJP-ni adita sak dilgiparang, Gambegre by-election-o susana sikenganiko parakmanaha ine janapatengon, skanggipa BJP survey-ko dakchenggen aro susana sikenggipa candidate-rangoni nambatgipakosa seokgen ine Hek parakataha.
Gambegre by-election-o BJP-ni tikitchi susana skaniko parakmangimin dilgiparangoni saksade Tura-ni MDC aro BJP-ni state vice president Bernard N Marak ong·engachim.
Adita salrangna skangsan, BJP-ni dilgiparang Tura-o tom·aniko ong·ataha aro ia tom·anio Gambegre constituency-ni BJP membor-rang, ia by-election-o susana sikenganiko paraktokaha ineba Hek aganaha.
Ia tom·anio BJP-ni dilgiparang, election-o nangchakegipa kamrangni gimin chanchirimaha aro election-na dingtangmancha roadmap-ko tariaha ineba BJP Minister aganaha.
Gambegre by-election-o Chief Minister Conrad K Sangma-ni jikgipa Mehtab Chandee-ba susaengani gimin ian namen bilakbee susagrikna sienggipa by-election-o ong·engama ine sing·anina aganchakaniko on·angskaengon, “Gambegre constituency-ni gimin anga an·tangde name ma·sipaja indiba chinga chenasa susagen,” ine Hek parakataha.
Gambegre by-election-na da·o dipet NPP-na agrede gipin dolrangoni darangba candidate-rangko paraktokkujaengachim.
Kobor man·soani gitade, Gambegre by-election-na Trinamool Congress (TMC), a·dokni gitcham minister Zenith Sangma-ni jikgipa aro Dengnakpara-ni MDC Sadhiarani M Sangma-ko minge donmanaha aro Indian National Congress (INC)-ba Jingjang M Marak-ko minge donenga.