Tourist Taxi association-ni gita jinma tom·bimonganiko ong·atenga

SHILLONG: Meghalaya a·dokni dingtang dingtang tourist spot-rangona Assam taxi-rangni mande salruraaniko jegalna gita September 18 tariko, All Khasi Meghalaya Tourist Taxi Association (AKMTTA), Shillong songjinmani Malki kal·chakramo jinma tom·bimonganiko ong·atna tik ka·angaha.
Meghalaya a·doko taxi salruraenggipa manderangoni 60 percent-de association ba dolrang baksa bakrimgijagiparangsa ong·a aro bangki 40 percentba dingtang dingtang dake bikotgipa dolrangsa ong·a ine adita salrangna a·dokni Tourism Minister Paul Lyngdoh-ni aganani ja·man, Khasi Hills jolrango taxi salgiparangni bilko aro ku·cholsan ong·aniko mesokna gita ia tom·bimonganiko ong·atna tik ka·angaha.
Ia rally ba jinma tom·bimonganiko ong·atani bidingo kobor ra·timgiparangna u·iatengon, minister-ni agangipa kattarangko jegalatenba, a·doko taxi salgiparangni ku·mong nangrimaniko manderangna ong·gija dake u·iatna jotton ka·aha ine AKMTTA-ni president Ricaldinus Dohling parakataha.
“Ia tom·bimonganio jinma chingni ku·mong nangrimaniko mesokna sienga,” ine Dohling aganenba, ia pilak taxi association-rangan ku·cholsan ong·e a·dokni tourist spot-rangona Assam taxi-rangni mande salruraaniko jegalenga ine parakataha.
Iana skang, re·anggipa antioba anti gimikna AKMTTA-ni gita nisan gisimko songe jegalanirangko dakangahachim ine nikna man·a.
Meghalaya a·dokna Assam a·doksa kajinarangko man·e on·enggipa gita ong·enga ine Tourism Minister-ni agangipa kattarangna aganchakaniko on·angskaengon, a·doktango revenue model-ko namdapatna man·jaenga ine Dohling, a·dok sorkariko matnangataha.
“An·seng baljokaniba ong·ja maina, lekka poraba ong·ja maina ia pilak kamrangon a·dok sorkari, Assam-osa pangchakbata gita nikenga,” ine AKMTTA-ni president aganaha.