TURA: Poshan Tracker Update-rangko ka·anio kamrangko nambate ka·na man·na gita gital mobile phone-rangko on·china didie, South West Garo Hills a·jani Ampati-o donggipa All Garo Hills Anganwadi Workers & Helpers Federation, Social Welfare department-ni Director-na sedoataha.
Iani bidingo Social Welfare-ni Director-na sedoatengon, department-ni nangnikani gita Anganwadi worker-rang kamrangko ka·na kusi ong·a indiba namgipa mobile phone-rang dongjani a·selo kamrangko chu·sokatna man·jaenga ine federation parakataha.
“Sorkarini on·gipa gitcham mobile phone-rang mitam kam ka·jaha aro gitcham ong·e Poshan Tracker Application-ni nanganirangko chu·sokatna man·jaengaha. Iani a·selan Anganwadi worker-rang, system-o log in ka·e record-rangko update ka·na ba nanggipa kamrangko nina man·jaengahani gimin kamrangko name chu·sokatna man·jaengaha,” ine federation parakataha.
Batanggimin jarangon mobile phone-rang kam ka·jaengani gimin ba mobile phone-rang dongjani gimin Anganwadi worker-rang u·iatahachim indiba da·alonan ia neng·nikanirangko namatna ja·kurangko de·kujaenga ineba federation parakataha.
Anganwadi worker-rang bang·gija dormaharangkosan man·paengani gimin an·tangtangde mobile phone-rangko brena chol ong·paja ineba federation-ni dilgiparang parakataha.
Jagnini gisepo mobile phone-rangko on·jagenchimode Anganwadi worker-rang kamrangko dontongate jingjengatna draatako man·gen ineba federation, mikrakataniko on·angaha.
“Chinga an·tangtangni kamrangko ma·siengoba nangchongmotgipa cholrang gride kamrangko ka·na man·jawa,” ine All Garo Hills Anganwadi Workers & Helpers Federation parakataha.