TURA: Anganwadi worker-rang jatna aro a·songna an·tangtangko on·kange kamrangko ka·engoba dingtang dingtang neng·nikanirangko chagrongna nangtokenga ine Tura-ni saksa social activist Cherian Momin parakatenba, Anganwadi worker-rangni dingtang dingtang neng·nikanirangko niatchina gita Social Welfare department-ni Principal Secretary Sampath Kumar-na sedoataha.
Kam ra·doatako man·na nangenggipa Anganwadi worker-rangni gimin janapatengon, poraia gadang donge ru·uta bilsirangna kam ka·enggipa Anganwadirangko kam ra·dona gita department-onin ge·etaniko on·manahaoba da·alonan kamrangko ra·doatkujaenga ine Momin, Principal Secretary-na sedoatgipa chittio parakataha.
Momin-ni parakatani gitade, nanga gita poraiani gadang donge bilsi bonga ba una bate kam ka·sogimin Graduate Anganwadi worker-rangko kam ra·dona gita Social Welfare department u·iataniko on·manahachim indiba da·alonan ia Anganwadi worker-rangko kam ra·doatkujaengachim.
Anganwadi worker-rangni chagrongna nangenggipa dingtang dingtang neng·nikanirangko janapatengon, Poshan Abhiyan aro uandakgipa dingtang dingtang scheme-ni kamrangko ka·na gita Anganwadi worker-rangna bosturangko on·jaengani a·sel neng·nikanirangko chagrongna nangtokenga ine Momin, Social Welfare department-ni Principal Secretary-na sedoatgipa chittio janapataha.
“Poshan Abhiyan aro uandakgipa dingtang dingtang scheme-rangni chu·sokgipa ong·anide Anganwadi worker-rangni jakosa ong·ani gimin skanggipa Anganwadi worker-rangnan tangka paisani gita aro pilakni gita dakchakanirangko on·chengna nanggen,” ine Momin parakataha.
Indake ong·engon, Anganwadi worker-rangna dormaharangko somoi gita ong·jaengani gimin, kam ka·giparangna kamni korosrangko chu·onga gita on·jaengani gimin MPR form aro register-rang chu·ongjaengani gimin, me·dik sam·dik aro uandakgipa bosturang chu·ongjaengani gimin Anganwadi centre-rango nokrang chu·ongjaengani gimin, kam ka·giparangna travel allowance-rangko on·jaengani gimin aro uandake Anganwadi worker-rangni chagrongna nangenggipa dingtang dingtang neng·nikanirangkoba Momin, Social Welfare department-ni Principal Secretary-na sedoatgipa chittio janapataha.