GH-o kilkra game cha·giparangni namgnina workshop-ko ong·ata

TURA: Garo Hills-o kilkra game ge·e cha·enggiparangni namgnina aro an·seng baljokgnina re·anggipa September-ni 21 tariko, Nagpur-o donggipa ICAR-CICR, Tura-ni College of Community Science (CCS) baksa nangrime salsani workshop-ko ong·atangaha.
Ia workshop-ko Dr Shipra Nagar dilangaha aro ia workshop-o bak ra·giparangna rimchaksoani kattarangko aganangengon, ia workshop-ko ong·atani giminba jinmana agan-talate on·angjolaha.
Ia workshop-o Udaipur-ni MPUAT College of Community Science & Agricultural Sciences-ni ning·o donggipa Human Development & Family Studies-ni Prof Gayatri Tiwari, mongsonggipa sokgipa ong·e, workshop-o bak ra·giparangna aganprakengon, maikai kilkra game ge·e cha·giparang an·seng baljokani baksa an·tangtangna man·dapanirangko ra·bana man·gen, uarangni bidingo agan-talate on·angaha.
Ia tom·anio, Tura CCS-ni Dean, Dr Jyoti V Vastrad-ba jinmana aganprakengon, Garo Hills-ni Sadolpara jolo ge·batenggipa kilkrani gamchatanirangko agan-talate on·angaha.
Ia workshop-ko ong·atanio, kilkra game cha·giparangna agan-skie on·anggipa gipin manderangara, Nagpur ICAR-CICR-ni Senior Scientist Dr Ramkrishna GI, Dr Kh R Aimol, MTTC & VTC-ni Assistant Professor Dr Kencharaddi aro gipinrang ong·a.