SHILLONG: Meghalaya a·dokni Sarva Shiksha Abhiyan (SSA) skulrango skigiparangba sorkarini dingtang dingtang kamna ra·anio bak ra·pana man·na gita age relaxation ba bilsi komiatchina dabianiko da·o a·dok sorkari niengkua ine Bristibar salo, a·dokni Education Minister Rakkam A Sangma parakataha.
“SSA skigiparangni bilsiko komiatna gita chinga cholrangko niengkua. SSA skulrango skigiparangba sorkarini dingtang dingtang kamna ra·anio bak ra·pana man·na gita iani bidingo proposal-ko on·anggen,” ine Education Minister parakataha.
Da·o dipet ian tik ong·sranga ong·kuja ine talataniko on·angskaengon, SSA skulrango skigiparangna a·dok sorkari man·a gita dakchakanirangko on·na jotton ka·engani giminsa skigiparangni bilsirangko komiatani giminba chanchienga ine Sangma parakataha.
SSA skulrango skigiparangni dormahako 100 percent-chi bariatchina gita dabie All Meghalaya SSA School Teachers Association (AMSSASTA) aro All Garo Hills SSA School Teachers Association (AGHSSASTA), September 30-ona somoiko on·angani ja·man iako a·dokni Education Minister parakataha.
September 30 tarikni gisepo skigiparangni dabianiko chu·sokatjagenchikmode a·dokni pilak biaprangon jingjengatanirangko dakanggen ine AMSSASTA aro AGHSSASTA mikrakataniko on·angahachim.