SHILLONG: Samagra Shiksha Abhiyan (SSA) skulrango skigiparangna 100 percent-chi dormaha bariatchina dabiani bidingo a·dok sorkari maming aganchakanirangko on·kujaengani gimin All Meghalaya SSA School Teachers Association (AMSSASTA)-ni ning·o skigiparang, asonge jingjengataniko Shillong songjinmani Malki kal·chakramo a·bachengataha.
AMSSASTA-ni president Peter Thyrniang-ni kobor ra·timgiparangna parakatani gitade, SSA skulrango skigiparangna 100 percent-chi dormahako bariatchina gita uamang 2019 bilsionin sorkario dabiengachim indiba ia dabianiko sorkari chu·sokatna gisik nangjaengani gimin uamang sorkarini kosako jingjengataniko a·bachengataha.
Skigiparangni dabianiko September 30 tarikni gisepon chu·sokatchina gita sorkarina somoiko on·ahachim ine janapatengon, SSA skulrango skigiparangni dormahako 100 percent-chi bariatna gita sorkari see on·jaskal uamangni jingjengataniko dontongjawa ine AMSSASTA-ni president parakataha.
“Chinga SSA skulrango skigiparangde sorkarini maming benefit ba allowance ba chuttirangkoba man·paja aro tik ka·gimin dormahamangmangkosan man·paengani gimin chingni dormahako da·o 100 percent-chi bariatna nangchongmotengaha,” ine ua aganaha.
Thyrniang-ni aganani gitade, SSA skulrango skigiparangna bilsichetna skangsa 107 percent-chi dormahako bariatahachim indiba untalan skigiparangna dormaharangko bariattaia dongkujaengachim.
“SSA skulrango skigiparangna dormaha bariatani da·o bilsichet ong·pilaha, uni gimin chingna 100 percent-chi dormahako bariatna nanga,” ine AMSSASTA-ni president dabiangaha.
“Mandeni nangchongmotgipa bosturangde salantian dam bariroroenga indiba chingni dormaharangkode 2017 bilsionin bariatchipkujaengani a·sel chinga nokdang chalaianio namen neng·nikanirangko chagrongna nangtokenga. Uni gimin SSA skulrango skigiparangni dormahakoba bariattaichina chinga sorkario dabienga,” ineba ua aganaha.
Indake ong·engon, Meghalaya a·dokni SSA skulrango skigiparang, kamni gita naljokaniko man·china ine jagnini gisepon niamko ra·gatchina Meghalaya SSA School Association (MSSASA), a·dok sorkario dabiangskaaha.
SSA skulrango skigiparangni kamko naljokatna gita jagnini gisepo niamko ra·gatgenchimode skigiparang jingjengatanirangko dakanggen ineba mikrakataniko on·angaha.
General Executive Meeting-ko ong·atani bidingo talate on·angengon, gipin a·dokrango gita Meghalaya a·dokoba SSA skulrango skigiparangni kamko naljoke rakkina man·na gita ia tom·anio niamko ra·gatchina skigiparang sorkario dabitokaha ine MSSASA-ni president Aristotle Rymbai parakataha.
Iani bidingo Education department, jagnini gisepon pilak nanga kamrangko matchote a·dok sorkarina proposal-ko on·na nanggen ineba Rymbai parakataha.
“Jagnini gisepo chingni dabiani gita chingni kamrangko naljokatna niamrangko ra·gatna man·ja ong·ode chinga jingjengataniko dakana agre gipin cholrang dongjawaha,” ine Rymbai aganaha.
Ia jagnini gisepo SSA skulrango skigiparang, a·dokni Chief Minister Conrad K Sangma-ko man·chape sak 12 cabinet minister-rangko grongna gitaba tik ka·angaha.