A·arang be·anichi komibeoba mande sak 3 sianga
TURA: Re·anggipa Bristibar salonin mikkarang dontonggija waangahani a·sel Sukrobar pringo, Garo Hills-ni bang·bata biaprangon a·a be·anirangko, chi bananirangko aro rama jal·lang nosto ong·anirangko nikna aro knasona man·aha.
Koborko man·soani gitade, a·a be·dapani aro chi bananirang ia chang Dalu jolrango bilongbatangaha aro ia jolrango a·arang be·dapako man·e komibeoba sakgittam manderang siangna gita nangaha.
A·a be·dapako man·e sianggipa manderangara, Dalu jolo donggipa Koinadubi songni bilsi 57 ong·gipa Santa N Marak, Sorokpara songni bilsi bonga ong·gipa Miando P Marak aro Karonggre songni bilsi 18 ong·gipa Sanira M Marak ong·achim ine kobor on·timgiparang parakataha.
Kobor on·timgiparangni u·iatani gitade, Sukrobar pringo mikkarang jimbee waengmiting somoio Dalu jolo donggipa Koinadubi songni nok te·sako a·a be·dapaha aro a·a be·dapako man·e ia nokni ma·gipa janggiko gimaatna nangaha aro uni demechikgipaba bilongbee saknaanirangko man·na nangaha.
Sukrobar pringni bakon Sorokpara songoba nok te·sako a·a be·dapaha aro ia a·sel ong·anio bilsi bonga ong·gipa me·a bi·sa siangna gita nangskaaha. Uni ja·man Karonggre songoba nok te·sako a·a be·dapaha aro ia nokko a·a be·dapanio bilsi 18 ong·gipa me·chik saksa so·otako man·skana nangaha.
Koborko on·ani gitade, Bristibar salonin mikkarang dontonggija waangahani a·sel South Garo Hills a·jaona dakanggipa border ramaoba Dalu Chaipani jolo donggipa dolong ge·sako chi pe·angaha aro da·o ia rama gita re·ruraaniko champengataha.
Una agreba South Garo Hills a·jaona dakanggipa ramani bang·a biaprangon a·a be·dapanirangchi rama jal·langrangni nosto ong·aniko aro rama champengata man·aniko nikangna man·aha.
Chokpot joloba Dareng chibima dal·bae, bang·a biaprangon chi bannanirangko nikna man·aha aro kobor man·soani gitade, Silkigre PHC aro Rongrikkimgre PHC-koba chi bananichi bang·en nosto ka·angaha.
Sukrobar pringo, Tura-ni dingtang dingtang biaprangoba a·a be·anirangko nikna gita man·angaha aro bang·bata biaprangon manderangni nok-jam, bagan bari, rama jal·langrang aro manderangni gam-jinrangko a·a be·dape manderang bang·en noksan ong·atako man·na nangaha.
Tura Hawakhana jolo, a·dokni gitcham Minister Clement Marak sagini nok sambao donggipa mi dokkan ge·sako a·a be·dapaha aro a·a be·dapanichi ia dokkanni manderang saknaanirangko man·na nangtokaha. Koborko on·ani gitade, ia dokkanko a·a be·dapanio, dokkano donggipa manderang pilakan a·a dapako man·ahachim indiba ja·mano NDRF aro SDRF-ni manderang re·bae, uamangko jokatna gita man·aha.
Apsan daken Tura jillani dingtang dingtang biaprangoba bang·en a·a be·anirangko nikangna gita man·aha.
South West Garo Hills a·jaoba, bang·en a·a be·anirangko aro chi bananirangko nikna aro knasona man·aha.
Koborko on·ani gitade, South West Garo Hills a·jani Rerapara, Okkapara aro Garobadha jolrango chi bananirangchi manderang neng·nikanirangko chagrongna nangtokaha aro apsan daken Mahendraganj jolrangoba chi bananirangko nikna man·aha.
A·a be·anirangchi aro chi bananirangko baditana kingking manderang noksan ong·atako man·na nangahachim da·o dipet hisapkuengani gimin tale aganna man·kujaenga ine official-rang parakataha.