WILLIAMNAGAR: A·dokni Animal Husbandry aro Veterinary, Fisheries, Printing aro Stationery Minister, AL Hek, PHE, Soil aro Water Conservation, Housing-ni Minister Marcuise N Marak baksa, East Garo Hills Deputy Commissioner, Vibhor Aggarwal, Superintendent of Police, SA Rynjah, Animal Husbandry aro Veterinary Director, Dr. CD Sangma aro gipin dilgiparangni dongpaanio Sukrobar salo Samanda Veterinary Dispensary-ni gital building-ko Samanda-o nokdonggae on·aha.
Dispensary nokdonggae on·anio aganengon, ia dispensary-ko chalaianio a·jolni manderangna namen nangchongmotgipa ong·a aro veterinary department-ni official-rangan, a·joltango jile-ale cha·giparangni nanganirangko on·anio daito gnanggipa ong·a ine Hek aganaha. A·jolni manderangna dispensary-ni namgnirangko de·e mesokatengon, a·jolni manderangni namgnina kamtangtangko namedake ka·china gita veterinary official-rangko Minister didiaha.
Unomitingo, dispensary-o man·gipa cholrangko man·e ra·china gita PHE Minister Marcuise N Marak, songni-nokni manderang aro jile-ale cha·giparangko didiaha, aro uamangni jila-alanirangna nanggipa sana-bananio veterinary official-rang baksa agangrikchina gitaba ua didiaha. Indake ong·engon, anti-bajaro palna gita matchu-matte so·otchakramkoba Williamnagar-o ru·utgijan rikgen ineba Marak manderangna ku·rachakaha.
Apsandake East Garo Hills Deputy Commissioner, Vibhor Aggarwal-ba, veterinary dispensary-o man·gipa namgnirangko manderangna agan-talate on·ani ja·mano, uarangni namgniko ra·china gita manderangko didiaha.
Unomitingo, 2021-2022 bilsina RIDF-ni chamatgipa NABARD-ni chamatgipa Gong 1.72 tangkarangchi ia dispensary-ko rikaha ine Animal Husbandry aro Veterinary-ni Director, Dr. CD Sangma manderangna u·iataha.
