SHILLONG: SSA skulrango skienggiparangni dormahako bariatchina dabienggipani bidingo a·dok sorkarini ku·rachakaniko man·jaengani gimin All Meghalaya SSA School Teachers Association (AMSSASTA), a·songni Prime Minister Narendra Modi-na sedoatskaaha.
Iani bidingo a·songni Prime Minister-na sedoatengon, a·dokni SSA skulrango skienggipa sak 13,000 manderangna dormahako bariatchina gita AMSSASTA-ni dilgiparang didiataha.
“Ia sal somoirango pilak nangchongmotgipa bosturangni dam namen rakbatahani a·sel bang·gija dormahako man·paenggipa SSA skigiparangde janggi tanganio neng·nikanirangko chagrongna nangtokenga. Uni gimin kamtangtangko chu·sokatanio skigiparangni dormaharangkoba bariatchina chinga nang·ko mol·molenga,” ine AMSSASTA-ni dilgiparang, Prime Minister-na sedoatgipa chittio janapataha.
SSA skulrango skigiparangna 2016-17 bilsiosa bon·kame dormahako bariatahachim ine janapatengon, da·o dipet LP skulrango skigiparangde gong 9200-oni gong 19,044-ona aro UP skulrango skigiparangde gong 9,900-oni gong 20,493-onasan dormahako man·paenga ine AMSSASTA-ni dilgiparang parakataha.
SSA skulrango skigiparangna 100 percent-chi dormahako bariatchina dabie, re·anggipa October 1 tarikonin skigiparang jingjengatanirangko dakengachim indiba da·alonan skigiparangni dabianiko a·dok sorkari chu·sokate on·kujaenga ineba AMSSASTA-ni dilgiparang, Prime Minister-na sedoatgipa chittio parakataha.