TURA: North Garo Hills a·jao LDA-cum-Typist aro gipin kamrangna District Selection Committee (DSC)-ni gita kam ka·giparangko seokna siengani gimin kamna seokaniko dongnuani gri jinmana parak ong·e dakchina GHADC-ni Rongrong MDC Rinaldo K Sangma, North Garo Hills a·jani Deputy Commissioner-ko didiataha.
Deputy Commissioner-na sedoatgipa chittio Sangma-ni parakatani gitade, North Garo Hills a·jao da·o DSC-ni vice chairman ong·enggipa mandeara MLA-ni depantesa ong·a ine manderang kenchaktokengani gimin dingtang dingtang kamrangna seokanio maming dongnuani gri jinmani nikrangrao dakchina ua nangnikenga.
“MLA-ni nokdangoni ong·aiani gimin pilak kamrangon ong·gija dakgen ia katta ong·ja indiba iandake dilgipani manderang DSC-ni membor ong·engon, mikkang niteani ba baseteani cholrang dongaia aro ian Prevention of Corruption Act-ni ning·o dongimin niamrangko pe·ani gita ong·a,” ine Rongrong MDC parakataha.
Iandakgipa obostarang ong·on, porikkarango chu·sokgiparang ong·e dal·dalgipa manderang baksa bak dongpagijagipa candidate-rangnade kamrangko man·ani cholrang dongrongja ine janapatengon, DSC-ni gita dingtang dingtang kamna manderangko seokanio maming dongnuani gri jinmana parak ong·e dakchina ine Rongrong MDC, North Garo Hills a·jani Deputy Commissioner-ko didiataha.