TURA: South West Garo Hills a·jani Zikzak Block ning·o namroro silroroaniko ra·bachina didie A·chik Holistic Awakening Movement (AHAM) Zikzak regional unit, a·dokni Chief Minister Conrad K Sangma-na sedoataha.
Zikzak primary health centre (PHC)-ko community health centre (CHC)-ona ra·doatchina didiatengon, ia PHC-o sanna banani cholrang namen komia indiba Zikzak block-ni ning·o da·o mandeni jelbra jelsuani namen tang·dobatahani gimin sanna bannani cholrangkoba tang·doatna nangengaha ine AHAM Zikzak regional unit parakataha.
Zikzak block ning·o degree aro technical college-rangko kulie on·china gitaba AHAM, a·dokni Chief Minister-ko didiataha.
“Jolni namroro silroroanide chubata gadangni lekka porako on·aniosa pangchakbata indiba Zikzak block ning·o da·onan degree college-rang dongkujani a·sel chubata gadangrango poraina nangenggipa chatro chatrirang, km 15 ong·e chel·gipa Mahendraganj aro km 17 ong·e chel·gipa Ampati-onasa re·ange poraina nangtokkuenga,” ine AHAM Zikzak regional unit-ni dilgiparang parakatenba, Zikzak-o degree aro technical college-rangko kulie on·china Chief Minister-ko mol·molataha.
Zikzak block ning·o kal·susaani cholrangko namdapatchina gitaba AHAM, Chief Minister-ko didiataha.
“Zikzak jolko kal·susaanio changgipa sapgipa chadamberang donganina namen mingsinga indiba ia jolrango kal·susaanirangko namdapatna gita maming cholrang dongjani a·selo chadamberangni changa sapanirang indin ong·gramenga,” ine AHAM Zikzak regional unit-ni dilgiparang parakatenba, Zikzak-o sports complex, stadium aro training centre-rangko kulie on·china Chief Minister-ko mol·molataha.
