SHILLONG: Congress dilgipa aro Tura MP, Saleng A Sangma, political dolrangko election-o somoio tamasa dake rona man·a, election matchotahaode manderangna uamangni ku·chakanirang bon·aijok ine aganaha.
“Political party-rang election-ni somoiosan tamasa dakna man·a idnbia vote puona ja·mande worker-rang aro voter-rang saksakoba dal·en ra·ja, ine Sangma aganaha.”
“Election-ni somoiosan manderangko vote-na dal·e ra·a, indiba election matchotahaode darangba ramram manderangni neng·nikako niatja aro agangrikna re·a dongja.”
Gambegre by poll-ni gimin aganengon Saleng indine aganaha, “Election-ara darang party-ni gisepo ong·ja, ia ka·donga aro bebera·aniosa pangchakgipa ong·a. Je candidate-an a·dok-chigana aro mandetangna dangdike on·a uosa pangchaka.”
“Darang candidate-ni mikkango NCP ba NPP-ni stamp dongja, uni gimin jensalo candidate-rang suaenga, unon NPP, Congress aro TMC-ni gisepo susagrikenga ine aganade tik ong·ja maina bon·kamoade manderangsa an·tangtangna dilgipako seoka.”
Indake Congress, Gambegre Assembly seat-ni by-election-o Jingjang M Marak-ko chakatatenga.
Ua skangba bilsi 2013 aro 2018-ni Assembly poll-o RAngsakona aro South Tura-oni independent candidate ong·e susaahachim.
Gambegre constituency-o by-election-ko November 13 tariko ong·atgen aro November 23 tariko vote-ko changen.
Siting Congress MLA Saleng A Sangma, June 10 tariko ong·atgipa Lok SAbha MP election-o Tura parliamentary seat-oni chakatao ua cheani ja·man Gambegre constituency bangbang ong·aha.
October 18 tariko election-ni notification-ko on·gen, uni ja·man candidate-rang nomination file ka·na man·gnok. Nomination file ka·ani bon·kamgipa tarik October 25 ong·a.
Gambegre-o chu·gimik sak 32,254 voter-rang donga. Jeoni sak 16,331 me·asarang aro sak 15,923 me·chikrang ong·a.
Political party-rang election ja·mande ku·chatangko gualaia: MP Saleng
Date:
Share post:
