TURA: 2022 bilsio bus gari a·sel ong·anio manderangko ka·dongbee jokatgipa Garo Hills-ni sakbri manderangna ‘Sarvottam Jeevan Raksha Padak’ award-ko on·china gita didie, A·chik Conscious Holistically Integrated Krima (ACHIK) dol, New Delhi-o donggipa Home Affairs Ministry-ni Secretary-na sedoataha.
2022 bilsio bus gari a·sel ong·e, chio sripangenggipa manderangko sakbri manderang jokatahachim aro uamangara, Sengrik D Sangma, Nibath D Sangma, Wagrik M Momin aro Jinjash D Marak ong·achim.
Indake ong·engon, ia sakbri manderangni kamko ma·mong sorkari mittelpilenba, uamangna Sarvottam Jeevan Raksha Padak-ko on·enga ine 2023 bilsini January 30 tarikon parakatahachim indiba da·alona kingkingan ia manderangna ia award-ni certificate aro medal-rangko on·kujaenga ine ACHIK parakataha.
ACHIK-ni parakatani gitade, ia Sarvottam Jeevan Raksha Padak award-ara, manderangni janggiko jokatna an·tangtangko on·kanggipa manderangna on·gipa award ba upattisa ong·achim.
“Ia mande sakbrini kamrangna ma·mong sorkari mittelpilaniko parakmanahachim aro ia a·sel ong·aoni da·o bilsigni batangpilengahaoba, ia manderangna da·onan certificate aro medal-rangko on·kujaenga,” ine ACHIK parakatenba, ia manderangna uamangni man·na nangenggipa award-rangko ta·raken on·china ma·mong sorkariko didiataha.