Shillong, Oct 23: October-ni 24 aro 25 tarikrango ‘Cyclone Dana’ ba balminduri, West Bengal aro Odisha a·dokni sagal rikamrango balnasiengani gimin sagal rikamrango donggipa manderangko aro ma·manti gam-jinrangko chel·chakna gita Indian Coast Guard (ICG) North-East Region, nanga gita kamrangko ka·soengaha.
Dana balminduri balani somoio manderangna aro ma·manti gam-jinrangna chel·chakanirangko on·na gita ICG, West Bengal aro Odisha a·dok damgnion jahas, sildoreng aro Remote Operating Station (ROS)-rangko tarisamsoaha ine official-rang u·iataha.
Sagalrango na·tok rim·enggipa manderangkoba naljokaniko man·na gita ta·raken sagal rikamrangona re·angpilchina ICG mikrakatanirangko on·angaha.
Balminduri balengmiting somoirango ta·raken dakchakanirangko on·na man·na gita ICG-ni pilak jahasrangko aro sildorengrangkoba tarie donattokaha.
Balminduri bala namkujaskal, sagalona re·angjachina gitaba ICG-ni official-rang, a·dok damgnio donggipa pilak manderangnan u·iatanirangko on·ataha.