Gambegre by-election-na sakgipin Ind candidate nomination file ka·a

TURA: Gambegre by-election-o susana gita Mongolbar salo Independent candidate Sengkrabirth Ch Marak-ni nomination file ka·angani ja·man Budbar salo, sakgipin Independent candidate Jerry A Sangma-ba, Tura-ni DC office-o an·tangni nomination lekkarangko Returning Officer-na on·angaha.
Ua an·tangni nokdangni manderang aro an·tangna chakpaenggipa manderang baksa Tura-ni DC office-ona re·baenba, nomination file ka·angaha.
Nomination file ka·angani ja·man kobor ra·timgipa manderangni sing·anirangna aganchakaniko on·angengon, ia by-election-o chegenchimode uni skanggipa aro mongsonggipa daitode, Gambegre constituency-o sanna banana kamrangko, lekka porako aro rama jal·langrangko namdapatanian ong·gen ine Sangma parakataha.
Ia by-election-o NPP, TMC, BJP aro Congress gita dal·dalgipa dolrang baksa susana ka·dongaiama ine sing·anina aganchakaniko on·angskaengon, Nokgipa Isolan uko chegipa ong·atna nangnikenga ong·ode ua chegipa ong·telaigen indiba Nokgipaan uko chegipa ong·atna nangnikjaenga ong·ode ua chena man·teljawa ine Sangma aganaha.
Chadamberangko politics-ni kamrango bak ra·china aro iandakgipa election-rango susae nichina gitaba ua, an·tangni chadambeskarangko didiataha.