SHILLONG: Shillong-Nongstoin-Tura ramako tariani bidingo tol·e matnanganirangko dakaha aro manderangko dilsretna jotton ka·aha ine matnangatskaenba, ia project-ko jako ra·e ka·gipa dol, Meghalaya sorkarini kosako mokordoma ka·pangpilna tik ka·angaha.
Ia project-ko jako ra·e ka·gipa doloni koborko on·ani gitade, ia project-ni contract-ko a·dok sorkari, 2011 bilsini February jao, dakkianio pangchake ia dolna on·ahachim.
Ia project-ko matchotatani somoi ba tarikara 2014 bilsini March 6 tarik ong·achim ine janapatengon, sorkarini ka·gipa case-ara taridapgipasa ong·a aro ia project-ni ja·manchakaniko dongnuna jotton ka·anisa ong·aha ine ia ramako jako ra·e tarigipa company-ni manderang parakataha.
Ia company-ni parakatani gitade, ia ramara km 265 ong·gipa rama ong·e a·doko namen dal·begipa project ong·achim aro ia ramako a·briarigipa biaprang gitasa tarina nange dingtang dingtang neng·nikanirangko chagrongna nangahani gimin a·dokni PWD-ni gitaba bilsi gittam batpile ja·manchakatako man·ahachim.
Kamrangko a·bachengna skang, a·arang ra·anio aro dingtang dingtang kamrangon ja·manchakahani a·selsa ia project-ni koros tang·dona gita nangaha ine janapatengon, ia project-ko uamang 2017 bilsion matchotate on·na man·aha aro uamangni tarigipa dingtang dingtang state highway-rangba da·onan name dongkuenga ine ia ramako tarigipa company-ni official-rang parakataha.
A·dokni kamrango ru·utbee ja·manchakahani a·selsa ia project-ni koros gong kror 1303-oni gong kror 2406-ona gadoangna nangaha ineba ia ramako tarigipa contractor-rang parakataha.
2022 bilsiona kingkingan, ia project-ni ja·manchakanina Meghalaya sorkari an·tangtangde dosko ra·na jechake, Union Road, Transport & Highways Ministry-kosa dos galna jotton ka·aha ine janapatskaengon, “Ia kamo maming ja·manchakanirang dongja inesa a·dok sorkari a·kangpilahachim aro da·o kamrang ru·utanina aro korosrang gadoanina chingni company-ko matnange case ka·aniara an·tangtangni dosko dongnuna jotton ka·anisan ong·enga,” ine ia ramako tarigipa company-ni official-rang parakataha.