BAGHMARA: South Garo Hills a·jani gital Deputy Commissioner (DC) office-ko rikna gita Bristibar salo, a·dokni Governor CH Vijayashankar, video conference gita pangchakaniko songe on·ataha aro ia gital office-na pangchakaniko songe on·anganio, a·dokni Education Minister Rakkam A Sangma, Chokpot MLA Sengchim N Sangma aro dingtang dingtang official-rangba Baghmara-ni Circuit House-o dongpae bak ra·angaha.
Bristibar salo a·dokni Governor, Baghmara-ona re·baani ong·genchimoba, mikka balwarangni a·sel helicopter onchongna man·jae re·bana man·jahachim aro uandaken ua video conference gita ia gital DC office-na pangchakaniko songe on·atskaaha.
Mikka balwa ta·rakani a·sel South Garo Hills a·jaona re·bana man·jahani gimin an·tangni suk ong·gijaniko parakatengon, ia gital DC office-na pangchakaniko songanichi, South Garo Hills a·jani manderang bang·en namgnirangko man·gen ine a·dokni Governor CH Vijayashankar, an·tangni ka·dongchakenganiko parakataha.
South Garo Hills a·jana nangchongmotenggipa gital DC office building-na tangka paisarangko chame on·ahani gimin ua a·dokni Chief Minister Conard Sangma aro Education Minister Rakkam Sangma-koba mittelpilangaha.
Ia gital DC office-na pangchakaniko songe on·anio a·dokni Education Minister Rakkam Sangma-ba jinmana aganprakengon, Baghmara-o ia gital DC office-ko rikna video conference gita pangchakaniko songe on·atahani gimin a·dokni Governor-ko mittelpilangaha aro ia project-na gong 149, 859, 577 tangkarangko chame on·ahani gimin a·dokni Chief Minister-koba mittelpilangaha.
South Garo Hills a·jako man·aoni bilsi 32-ni ja·man gital DC office-ko man·enganiara a·jao songdongenggipa manderangni ru·uta bilsirangna nangnikaniko chu·sokatani gita ong·aha ineba ua aganaha.
SGH-ni gital DC office-ko rikna a·dokni Guv, internet gita pangchakaniko songa
Date:
Share post:
