TURA: South Garo Hills, Gasuapara songoni manderang, Sukrobar salo Gasuapara Playground-o tom·dake MGNREGA-ni tangkako man·kujaengani gimin chanchirimangaha.
“MGNREGA scheme-ni tangkako chinga man·kujaengani gimin jajrengenga. Iani a·sel jolni manderang, jemangan salanti janggi tangani nangnikarangko chu·sokatna ia scheme-ni tangkako nichake dongpaenga, uamang bilongen neng·nikako man·enga. Uni gimin chinga authorities-ko scheme-ni beneficiary-rangna somoi gita tangkako on·china gita mol·molata. MGNREGA scheme-ko songo donggipa manderangna janggi tangna cholko on·na miksonge a·bachengatahachim, indiba songni manderangan da·ora man·a nanggniko man·jaenga, uni gimin sorkariko ia mamlako nirokatchina mol·molatenga ine songni manderang aganaha.”
Songoni jemangan Aadhaar -ko bank account baksa link ka·kujachim ua sianggiparangni death certificate-ko on·kujani gimin scheme-ni tangkako man·kujaenga ine block-ni official-rang songni manderangna aganaha. Indake ong·engon death certificate-ko on·a ja·manba scheme-ni tangkakon man·kuja.
“Sorkarini ka·dongataniko man·e aro office-ni kamrangko chinga u·ichaka indiba scheme-ni tangka man·kugijagipako ta·rake on·na ong·ode nambegen, maina bang·a nokdangrangan MGNREGA wage-ni bill-o pangchake janggi tangpaenga. Uni gimin chinga iani bidingo daitoko jako ra·e kam ka·gipa department-ni chittiko sena tik ka·aha,” ine songni manderang aganaha.
