SHILLONG: North Eastern Hill University (NEHU)-ni Registrar Colonel (Retd) Omkar Singh, Deputy Registrar Amit Gupta aro gipin official-rangko ra·galchina dabianiko NEHU-ni Vice Chancellor Prof Prabha Shankar Shukla knachakjaengani gimin Mongolbar salo, NEHU Students Union (NEHUSU) aro Khasi Students Union (KSU) NEHU Unit-ni dilanichi chatro chatrirang, Shillong university campus ning·o jinma jegale re·jomaniko ong·atangaha.
NEHU-ni Registrar, Deputy Registrar aro gipin official-rangko niam grisa kamo rakkiaha ine matnangenba, ia official-rangko kamoniko ra·galpilchina gita NEHUSU aro KSU NEHU Unit, Sombar salona somoiko on·angahachim indiba dongimin somoi gita uamangni dabianiko chu·sokatjahani gimin Mongolbar salo chatro chatrirang lekka pal·takrangko ra·enba, Central Block-oni Vice Chancellor-ni office donggipa Administrative Block-ona re·jomangtokaha.
Chatro chatrirangni dabianirangko knachakjaengani gimin NEHU-ni VC Prof Shukla-ko jegalatengon, uni iandakgipa kamrangara an·tangni bilko mesokna aro chatro chatrirangko ning·ao donna jotton ka·anisa ong·enga ine NEHU Teachers Association (NEHUTA)-ni president Lakhon Kma parakataha.
NEHU-ko chalaianio uni chu·sokjaengani gimin manderang jegaltokengoba ua gipin biaprangonasa kate donganiara an·tangni kamko namdapatna sikgijaniko mesokanisa ong·a ineba ua aganaha.
“NEHU-o kam ka·giparang aro poraienggipa chatro chatrirang neng·nikanirangko chagrongna nangtokengon, ua (VC) da·oba chutti ra·esa roskaenga. Iako chinga NEHUTA-ni gita raken jegalenga. Jegalenggipa dolrang baksa uni agangrikna gisiko nanggijaniko mesokaniara niam gri kamo rakkia man·gipa Registrar, Deputy Registrar aro gipin official-rangko ra·galna sikgijaniko mesokanisa ong·enga,” ine NEHUTA-ni president parakataha.
