SHILLONG: North Eastern Hill University (NEHU)-ni non-teaching staff chu·ongjaengani a·sel kamrangko ka·anio neng·nikanirangko chagrongna nangtokengani gimin Sombar sal dipet NEHU Non-Teaching Staff Association (NEHUNSA), kamrangko dontongate ari gri jingjengatna a·bachengataha.
2023 bilsini November 3 tarikon NEHU-ni non-teaching staff-rangko ra·dapna gita advertisement-ko ba u·iataniko on·ahaoba da·alonan kam ka·giparangko rakkidapkujaengani gimin NEHUNSA, Sombar sal dipet kamrangko ka·gija ari gri jingjengatna a·bachengataha.
Ia jingjengataniko ong·atengani gimin kobor ra·timgiparangna talate on·angengon, NEHU-ni Shillong aro Tura campus damgnion non-teaching staff ba skigipani kam ong·gija gipin kam ka·giparang komiangahani gimin uamang ia indefinite strike-ko ong·atna draatako man·aha ine NEHUNSA-ni president WR Synrem parakataha.
Synrem-ni parakatani gitade, University Grants Commission-ni dongimin niamo pangchake teaching aro non-teaching staff-ni ratio 1:1.1 ong·na nangani gimin gimin non-teaching staff-rangba sak 512 ong·na nangachim indiba da·o dipet Shillong aro Tura campus damgnion non-teaching staff ong·e kam ka·giparang gimik sak 250-mangsan ong·aiengachim.
“Mikkang bilsioba bang·en kamoni neng·takangna sienggipa staff-rang dongani gimin kam ka·giparangko ta·raken ra·dapjagenchimode university-o non-teaching-ni kamko ka·nagipa manderang komignok aro je kam ka·giparangsa neng·bee kamrangko ka·na nanggnok,” ine Synrem aganaha.
NEHU-ni non-teaching staff-ko ra·dapani bidingo ku·rachakaniko on·kujaskal uamang jingjengataniko dontongjawa ineba NEHUNSA-ni president mikrakataniko on·angaha.
Iana skangsan, NEHU-ni non-teaching staff-ko ra·dapna gita National Testing Agency (NTA), porikkako ong·atna tariahachim indiba ja·mano porikkako ong·atna man·kujawa ine NTA-ni seatgipa chittiko NEHU man·soahachim.
“September jaoba chinga dikdiksana jingjengatanirangko dakangahachim indiba NEHU-ni official-rang baksa agangrikon, September ja bon·ahaon uamang syllabus aro porikkana tarikko tik ka·gnok ine chingna ku·rachakahani gimin chingni jingjengataniko dontongatpilaha. Da·o October 30 tarik batangpilahaoba syllabus aro porikkani tarikrangko tik ka·a dongkujaengani gimin chinga tom·e chanchirimpiltaienba, ia jingjengataniko dakna tik ka·angaha,” ine NEHUNSA-ni president parakataha.
NEHUTA aro NEHUSU-ni dabienggiparangni bidingo janapatskaengon, uamangde iano bak ong·pagiparang ong·ja indiba uamang ia dolrangna chakpaaniko on·aha ine Synrem parakataha.
 |
ReplyForward
|