SHILLONG: West Shillong constituency-o National People’s Party (NPP), Trinamool Congress (TMC) aro United Democratic Party (UDP) dolrangoni sak 200-na baten Congress dolo napangaha.
Gipin dolrangoni Congress dolo napaniara ian a·bachenganisan ong·enga aro a·dokni gipin biaprangoba apsan daken bang·a membor-rang Congress dolo napna siengkua ine Meghalaya Pradesh Congress Committee (MPCC)-ni president Vincent H Pala a·kangataha.
“West Shillong-o bang·a manderangan ching baksa bakrimeaha aro ian namen namgipa kobor ong·a. District election-ba da·o sepangengahani gimin uamangoni bang·batan election-o susana nangniktokenga,” ine Pala, kobor ra·timgiparangna aganaha.
MPCC president-ni parakatani gitade, Khasi Hills Autonomous District Council (KHADC) election-o Congress dol, dam 29 seat-rangon susana miksongenga aro da·o sak 25 candidate-rangkode man·aha.
Badiaba constituency-rangnade Congress dolo candidate sakgnina baten donga ineba ua aganaha.
Nongthymmai constituency-o TMC-ni mitam dilgiparangba Bristibar salon Congress dolo napna miksongachim ine janapatengon, Gambegre by-election-o TMC susaengani gimin uamang election-ni ja·man Congress dolo napna tik ka·skaaha ine Pala parakataha.
Pala-ni aganani gitade, Ri Bhoi, Garo Hills aro gipin biaprangoba gitcham MLA aro MDC-rangko man·chape bang·a manderangan Congress dolo napna sienga.
Gambegre-ona re·angani ja·man Congress dolko ua bilakbate nikaha ineba MPCC-ni president a·kangataha.
“A·bachengode manderang chingko gittamgipa biapo ine aganachim indiba da·o anga uamangko grongeon chingko number 1-ona tang·doangaha ine agantokaha. Angni chanchiani gitade chinga Gambegre seat-ko chena cholrang namenga,” ine Pala aganaha.