Tura: West Garo Hills-ni Wangala A·dam Chibragre-o salgittamna ong·atanggipa 100 Drums Wangala 2024 mejalo nambee matchotangaha jeon gittamgipa aro bon·kamgipa salo manderang bang·en wangalram a·damona sokbatokaniko nikna man·aha.
A·chik Jatni dingtangmanchagipa daka-rikaniko chel·chak-ripingna aro indakgipa namgipa biaprango soka-chakanina rakbee an·tangtangko on·kange kam ka·enggipa Wangala Committee memborrangko, mejalni bako Wangalaona mongsonggipa sokgipa Regional Director, North East, Ministry of Tourism, Govt of India Anil Oraw mittelaha aro kusi ong·chakani kattarangko aganaha. Manderangko indakgipa an·saogipa jatni festival-rango bakko ra·china gita didiataniko dakengon, mongsongbate chadamberang West-china niatna nanga indiba iako gisik ra·na nanggen je, an·chingni atchu-ambirangni daka-rikanirang gamchatbatgipa ong·a unigimin an·ching uarangko ja·rikna aro ripingna nanga ineba mongsonggipa sokgipa Oraw aganaha.
Traditional festival-ni gamchatani bidingo talataniko dakengon, re·baenggipa bilsirango Tourism Ministry-ni dakchakanirangko on·gen ine mongsonggipa sokgipa Oraw ku·rachakangaha.
Unomitingo festival-ona mandera·ako man·a kragipa sokgipa Director, North East Zone Cultural Centre (NEZCC), Ministry of Culture, Prasanna Gogoi indake aganaha je an·chingni ong·baaniko ja·pang ja·dilko aro an·ching atchu-ambini dakbewal-rikbewalko an·ching gualna nangja, uarangko ripingna nanga. Sakantian jattangni dakbewal-rikbewalko ma·sie ra·na nanga aro festival-ko mikkangchi chua gadangona sokatangna nanga, ua didianiko on·aha.
West Garo Hills Deputy Commissioner, Jagdish Chelani jean tom·bagiparang A·chikkuchi aganprakna gita jotton ka·ahachim, Wangala festival-ni gamchatani aro miksonganiko talatangaha.
Wangala, ian A·chikrangni dal·batsranggipa festival ong·a ine aganengon, Wangala Committee-ni Chairman Ronald Rikman Sangma Wangala festival-ni dakbewal rikbewalrangko talatangaha aro an·chingni ma·gitcham pagitchamrangni dakbewal-rikbewalrangko ripinganio an·ching sakantian jak snilpana nanga ine didianiko on·aha. Unbaksana festivalo bakko ra·gipa pilak dilgiparangko mittelan baksa pilak nama skanirangko on·giparangkoba ua mittelpilaha.
Skang chasongonin mingsingbaenggipa Late Millickson K Sangma-ni tarigipa git Wangala Anthem, “Dimdim Dimchong Dachichong”-ko salantian ring·rongaha.
Ia 100 Drums Wangala, jekon A·chikrang ratman-tetmanani ja·mano pattigipa ra·rongipa Misi-Saljong mite-na chroke, wangale mittelpil·skaaniko dake manianiko dakronga.
Ia Wangalaona Indiani a·paloni France, Belgium, Germany, Canada dakgipa a·songrangoni aro Tamil Nadu, Pune, West Bengal, Assam a·dokrangoni tourist-rang re·bae bakko ra·eaha aro dingtang dingtang biaprangoni media person-rangba re·batokaha aro A·chikrangni dakbewal-rikbewalrangko a·gilsakna mesokataha.
100 Drums Wangala festival-o, West Garo Hills-oni Gondenggre, Sadolbra, Chibragre, Chidaogre, Dalbenggre, Mikalbra, East Garo Hills-oni Rapdikgre, North Garo Hills-oni Wanokdamgre, South Garo Hills-oni Chepagre aro Bangkabra bakko ra·angaha. Aro uamangoni ia bilsini Wangala competition-o Chidaogre skanggipa bosksiko man·aha, uamangni ja·mano Gondenggre aro Dalbengre-ni chrokgipa dolrang gnigipa aro gittamgipa boksisrangko man·aha.
Mejal bon·kamgipa salni wangalanio Assistant Director Tourism, Government of India, Anil Kumar Gupta, Deputy Director, NEZCC Oliver Temsu Pongen, Inspector General, Shillong, H Singh Dhillon, Deputy Commissioner, West Garo Hills, Jagdish Chelani, Additional Deputy Commissioner, Manish Kumar, aro gipin official-rang, District Official-rang, Wangala Committee-ni memborrang aro Garo Hills gimikni dingtang dingtang biaprangoni re·bae bakko ra·tokaha.
Krimkro Music Festival 2024-ni gnigipa edition-o mingsinggipa git ring·giparang Riprap, Da Suraka, Saldorik aro gipinrang gitrangko ring·angaha, ia programko Department of Tourism-ni gita Wangala A·dam, Chibragre-o ong·atangaha.
