TURA: Chokpot-oni A·sakgre-ona re·gipa rama namsrangjahani a·sel Chokpot Civil Sub-Division-ni wilwilao donggipa manderang aro mongsongbate an·tangtangni nangchongmota kamrangna re·ruraenggipa manderang neng·nikanirangko chagrongna nangtokenga ine Sombar salo, Association for Democracy & Empowerment (ADE) Gasuapara unit parakatenba, ia ramarangko ta·raken taripile on·china a·dok sorkariko didiataha.
ADE Gasuapara unit-ni president Callyneccan Sangma-ni parakatani gitade, Chokpot-oni A·sakgre-ona re·gipa rama namsrangjahani a·selan manderang, wachini somoirangonade namen neng·nikanirangko chagrongna nangtokengachim.
“Rama jolrango songdongenggipa manderangni aganani aro chingni am·sandie man·ani gitade, wachini somoirango ia rama namjabatani a·sel re·ruraenggipa aro jolo songdongenggipa manderang neng·nikanirangko chagrongna nangbattokenga maina ia rama namsrangjahani a·sel sagipa manderangko salruraanio, dingtang dingtang biaprangona songre songgabatanio, chona rema bading chiwalanirangko dake cha·anio, game ge·e man·gipa bosturangko bazaar antirangona sokatanio, skul college-rangchi re·anio aro uandake dingtang dingtang nangchongmota kamrangna re·ruraenggipa manderang neng·nikanirangko chagrongna nangtokenga,” ine ADE Gasuapara unit parakatenba, ia ramako ta·raken taripile on·china a·dok sorkariko didiataha.
South Garo Hills a·jani mongsonggipa rama jal·langrangko tarigija galchipenga ine sorkariko matnangatengon, da·o bilsi gittamni gisepon ia pilak rama jal·langrangko tarie on·china aro Tura-ko Winter Capital songenba, Garo Hills gimiknan namgniko ra·bachina gita ADE Gasuapara unit, a·dok sorkariko didiataha.