TURA: West Garo Hills a·jani ning·o donggipa 56-Gambegre Legislative Assembly Constituency-ni gital MLA-ko seokna gita da·al Budbar salni bako Gambegre constituency-ni ning·o donggipa gimik sak 32,254 voter-rang, an·tangtangni polling station-rango pu·ongnok.
Gambegre constituency-ni gitcham MLA Saleng A Sangma, ia bilsini a·bachengachibara ong·atanggipa Tura parliamentary election-o chegipa ong·e MLA ong·aniko watna nangahani gimin ia by-election-ko ong·atna nangahachim.
Ia by-election-o National People’s Party (NPP), Meghalaya a·dokni Chief Minister Conrad K Sangma-ni jikgipa Mehtab Chandee A Sangma-ko susaatengon, Trinamool Congress (TMC)-ba a·dokni gitcham Minister Zenith Sangma-ni jikgipa aro Dengnakpara-ni MDC Sadhiarani M Sangma-ko susaatskaengachim. Una agreba ia by-election-o Indian National Congress (INC)-ni candidate Jingjang M Marak, Bharatiya Janata Party (BJP)-ni candidate aro Tura-ni MDC Bernard N Marak baksana Independent candidate sakgni, chong·motan Sengkrabirth Ch Marak aro Jerry A Sangma-ba susaenga.
Gambegre by-election-ko ong·atani tarikko Election Commission of India (ECI) parakatchengaonin ia pilak candidate-rang aro political dolrang, Gambegre constituency-ni dingtang dingtang biaprango bilakbee campaign-rangko ka·angtokaha aro uandaken ia by-election-na campaign ka·ani re·anggipa Sombar attam 4:00 bajion matchotangaha.
Gambegre constituency-o gimik sak 32,254 voter-rang donga aro ianoni sak 16,331-de me·asarang aro sak 15,923 voter-rangde me·chikrang ong·a.
Election official-rangni u·iatani gitade, Gambegre constituency-ni ning·o sakgittam service voter-rang, sak 993 chadambe voter-rang, sak 64 butchuma budepa voter-rang aro sak 100 be·enni gita cholgri ong·gipa voter-rang donga.
Gambegre constituency-ni ning·o gimik dam 51 polling station donga aro ianoni dam 31-kode critical polling station ine gadangko dona.
Indake ong·engon, Meghalaya Governor-ni ge·etanio pangchake, ia salo pilakan dilgipako seokanio bak ra·pana man·na gita Gambegre Assembly constituency-ni ning·o donggipa pilak office aro skul-college-rangko chutti wataha ine Election official-rang parakataha.
Negotiable Instruments Act 1881-ni ning·o chalaienggipa karkana ba uandakgipa biaprango kam ka·enggiparangba, Representation of the People Act 1951-ni Section 135B-ni ning·o on·gimin niamrango pangchake, paid holiday ba dormaha kattiani gri ua salo chuttiko man·na nanga ine General Administration Department-ni Secretary u·iataha.