SHILLONG: North Eastern Hill University (NEHU)-o ong·enggipa golmalrangko namatna gita Meghalaya High Court, ma·mong sorkarina somoi on·dapna tik ka·angaha indiba ia golmalrangko namatna man·chipjagenchimode High Court an·tangan jako ra·na tik ka·angskaaha.
NEHU-o ong·enggipa golmalrangni bidingo Meghalaya High Court-ni ukil P Yobin janape on·angengon, university-o tom·tomaniko ra·bapilna aro mikkangchi name chalaiangna man·na gita jako ra·e nanga gita ge·etanirangko on·china High Court-ko mol·molangaha.
Iani bidingo Meghalaya High Court-ni Chief Justice IP Mukherjee aro Justice B Bhattacharjee-ni Division Bench, knatime ra·angengon, NEHU-o ong·enggipa golmalrangko namatna gita a·dok sorkariba ma·mong sorkarina agan-ku·pattianirangko on·ataha aro ma·mong sorkariba dingtang dingtang ja·kurangko de·enga ine janapataha.
“NEHU-ko ma·mong sorkarisa chalaiani gimin ia university-ni golmalrangko namatna gita chinga ma·mong sorkarina adita somoirangko on·kuna tik ka·angaha. Indiba dongimin tarikona kingking golmalrang namchipjagenchimode NEHU-o ong·enggipa obostarangko High Court jako ra·e, nangani kri ja·kurangko de·anggen,” ine Meghalaya High Court-ni Division Bench parakataha.
Iani bidingo re·baenggipa November 20 tariko knaangtaina gita Meghalaya High Court, tik ka·e donangaha.
Indake ong·engon, iani bidingo a·dok sorkari, ma·mong sorkari, NEHU-ni Vice Chancellor, kam ka·giparang aro chatro chatrirangni dolrang baksaba agangrikangkuchina gita High Court ge·etaniko on·angaha.