Gambegre by-election-o susagipa candidate sakdokni rasiko da·al parakgnok

TURA: Re·anggipa November-ni 13 tariko ong·atanggipa 56-Gambegre Assembly Constituency by-election-ni vote-rangko da·al Sonibar pringonin channa a·bachengengahani gimin ia by-election-o susaanggipa sakdok candidate-rangni rasiko da·alan manderang ma·sina man·gnok.
Gambegre constituency-ni gitcham MLA Saleng A Sangma, ia bilsini a·bachengachibara ong·atanggipa Tura parliamentary election-o chegipa ong·e MLA ong·aniko watna nangahani gimin ia by-election-ko ong·atna nangahachim aro ia by-election-o National People’s Party (NPP) aro Meghalaya a·dokni Chief Minister Conrad K Sangma-ni jikgipa Mehtab Chandee A Sangma, Trinamool Congress (TMC)-ni candidate aro a·dokni gitcham Minister Zenith Sangma-ni jikgipa Sadhiarani M Sangma, Indian National Congress (INC)-ni candidate Jingjang M Marak, Bharatiya Janata Party (BJP)-ni candidate aro Tura-ni MDC Bernard N Marak baksana Independent candidate sakgni, chong·motan Sengkrabirth Ch Marak aro Jerry A Sangma-ba susaangahachim.
Ia chang Gambegre by-election-o constituency-ni manderang, an·tangtangni dilgipako seokanio gisik nangbate bak ra·angtokaha aro uandaken pu·onanirang 90.93 percent gapahachim.
Gambegre constituency-o gimik sak 32,254 voter-rang donga aro ianoni sak 16,331-de me·asarang aro sak 15,923 voter-rangde me·chikrang ong·a.
Election official-rangni u·iatani gitade, Gambegre constituency-ni ning·o sakgittam service voter-rang, sak 993 chadambe voter-rang, sak 64 butchuma budepa voter-rang aro sak 100 be·enni gita cholgri ong·gipa voter-rangba donga.
Indake ong·engon, ia by-election-ni counting ba chananiko da·al pring 8:00 bajioni a·bachengatenga aro skanggipa bako postal ballot-rangko chanchengenga ine Election official-rang u·iataha.
Election official-rangni u·iatani gitade, vote-rangko chanani somoio pilaknan parak ong·na man·na gita Election Commission, vote changipa biaprango CCTV camera-rangko donan baksana 3-Tier security system-koba donataha.
Gambegre constituency-ni dam 51 polling station-rango pu·onanirangko channa gita ge 14 table-rangko jakkalenga ineba Election official-rang parakataha.