TURA: Meja anti Sonibar salo East Garo Hills-o ong·atgipa District Selection Committee-ni examination ba porikkao tik ong·gijanirangko kobor man·aha. Porikka segipa candidate-rang, porikkako seatao tik ong·gijanirangko nike badi ka·ataha.
Candidate-ni aganani gita, je room-on ua sakgipin candidate-rang baksa asongahachim, uno invigilator ba porikka seaniko niroktimgipaan adita ming question-na aganchakanirangko on·e gimik candidate-rangna dakchakaha. Mitam room-rangode mobile phone-koba ra·napna on·aha aro candidate-rang internet-ko jakkale answer-rangko seaha. Porikka seatgipa room-rango CCTV camera dongode, ong·a obostarang gimikkon nikna man·genchim.
District-ni ning·o ga·akgipa dingtang dingtang post-rangna seatgia porikkako District Selection Committee (DSE) niroka.
“Iandakgipa mongsonggipa porikkako seatanio tik ong·gijanirang donga, iarangko name dake nirokna nangao ga·akachim. Assam-ode kamna porikkako seataon internet-ko champengata. Jeni a·sel porikka seanio maming togiani ba cha·bokani dongna man·ja, an·chingni a·dokba iako niate nina nanga, ine sakgipin candidate aganaha.
Iani bidingo sing·sandiaon East Garo Hills Deputy Commissioner, badia room-o mobile phone-rangko ra·napna on·aha ine sing·ataha. Indiba ong·a obostako badi ka·gipa mikkangona parak ong·e re·bana jechakaha.
