SHILLONG: Meghalaya a·doko songdongenggipa chonchongipa tribal-rang, chong·motan Hajong, Koch, Rabha, Boro, Kachari aro Mann jatrangna KHADC aro GHADC-ni ning·on regional council damgniko kulichina Garo Hills-ni Meghalaya Indigenous Minority Tribals Forum (MIMTF) dabiangaha.
Iani bidingo MIMTF-ni dilgiparang, Union Home Minister Amit Shah-na, Rajya Sabha-ni gitcham membor Rakesh Sinha-ni jako on·ataha ine MIMTF-ni ku·wattimgipa aro a·dokni gitcham minister KC Boro parakataha.
Boro-ni aganani gitade, Meghalaya a·dokko man·chengaonin, ia jatrangba ma·mong sorkarioniko tangka paisani gita dakchakanirangko man·pana ine Indian Constitution-ni Article 280-ni ning·o ia regional council damgniko songchina dabitokengachim indiba da·alonan uamangni dabianirang chu·sokgipa ong·na man·kujaengachim.
Ia chonchongipa tribal-rang, a·dokni dingtang dingtang biaprango priprae songdong a·chatokengani gimin satellite council-rangkoba on·china MIMTF dabiangaha. Meghalaya a·doko mongsonggipa Tribal jatgittam, chong·motan Khasi, Garo aro Jaintia-rangsa sorkarini bang·bata scheme-rangkon man·enga indiba ia chonchongipa tribal-rangde ma·mong sorkarini scheme-rangko man·patokjaenga ineba MIMTF matnangataha.
“Uni gimin ia chonchongipa tribal jatrangna regional council-rangko songe on·genchimode, lekka porani a·bao, bading chiwalanio, songsalo, politics-o aro pilakni gitan namroro silroroaniko man·pagen aro ia dabianiko ma·mong sorkari knachake chu·sokatgenchimode chingni manderangba, Meghalaya a·doko Khasi, Garo aro Jaintiarang gitan apsan gadangko man·pagen,” ine Boro aganaha.
Meghalaya a·dokni ning·o donggipa Indo-Bangla simarango manderangni jelbra jelsuanirang batrorobaengahani a·sel ia jolrango songdongenggipa Tribal jatrangna namen kenchakna nangani ong·engaha ineba Boro, an·tangni jajrengchakenganiko parakataha.
A·dokni chonchongipa Tribalrangna regional council-ko songchina dabia
Date:
Share post:
