SHILLONG: Gambegre Assembly constituency by-election-ni result-rangara manderangni namroro silroroaniko nangnike seokanikon mesokani ong·aha aro manderangni seokaniko Congress dol mande ra·a ine Opposition dolni Chief Whip aro Congress dolni dilgipa Ronnie V Lyngdoh parakataha.
“Manderang an·tangtangni nangnikaniko ia result-chi mesokaha aro manderangni seokaniko chinga mande ra·a. Meghalaya a·doko by-election-ko ong·ata changantian manderang, an·tangtangni nangnikanirangko chu·sokatna ka·donge, sorkariko chalaienggipa dolrangonikon seokrongbata,” ine Lyngdoh aganaha.
Meghalaya a·dokni manderang MP election aro by-election-o dingtang dingtang dakesa dilgiparangko seokronga ineba ua aganaha.
“Ian manderangni namroro silroroanina ka·oksie seokaniko mesokani ong·a. Iano maming ong·ja ine anga chinko mesokengade ong·ja indiba manderangni nangnikanirangara bon·changgijagipsa ong·a,” ine a·doko Congress dolni saksakamkam MLA aganaha.
NPP-ni candidate Mehtab Chandee-ara Chief Minister-ni jikgipasa ong·ani gimin uko seokode Chief Minister-ko seokaming apsanaigen inesa manderang, Mehtab Chandee-ko seokaha ineba ua aganaha.
“Chief Minister-ni jikgipako seokaniara chief minister-ko seokani gitan ong·enga ine manderang ka·dongenba, namroro silroroaniko man·na aro an·tangtangni neng·nikanirangko chel·chakna gita NPP-ni candidate-ko seokaha,” ine Lyngdoh aganaha.