TURA: West Garo Hills-ni Ranggira A·brio skul ge·samangmang donggipa, jekon 2015 bilsio kuliahachim, ua darangniba nirok simsakaniko man·jaenga aro skulni obosta da·alona kingking uanbaibai dongenga ine nikna man·a.
Songadam nokadamrango mingsa namdapatna nangchongmotgipara, lekka bidako on·anian ong·enga, uni gisepon indake skie ra·chakram biaprangan nirok-simsakani gri galchipaniko man·enganiara songsalo janggi tanganio ra·onaniko man·ani mingsa ja·pang ja·dil ong·chongmota. Ia skulara, ua songo gitchambatsranggipaoni ge·sa ong·achim, indiba da·ona kingkingba skulo maming facility-rang dongjae neng·nikaniko man·enga.
Skulo bi·sarangna aro skigiparangna nanggnirang chu·onga gita dongjae ia skulo poraienggipa chatro-chatrirang aroba uano skie on·enggipa skigiparangba dingtang dingtang neng·nikanirangko man·enga.
Nursery-oni class V-ona donggenchimoba skulo chu·ongagita skigiparang dongja, unbaksana uano chu·ongagita class room-rangba dongjani a·selo apsan room-on class ge·gni dakerang ra·dimna nangao ga·akenga. Bi·sarangna aro skigiparangnaba asong-chakani aro sechakani bench aro table-rangba chu·onga gita dongja. Aro skulo nangchongmotgipa, latrine ba paikana dongjani a·selo namen neng·nikarang ong·enga.
Indake ia skulko ua songni manderangsa aro skigiparangsa amadipet an·tangtangni bil-jaktangchi da·ona kingking pangkame rakkina jotton ka·enga. Maina darang ma·a paan an·tangtangni dedrangko lekka porako on·na sikgiparang ong·a.
Uni gimin ia skulo poraienggipa chatro-chatrirangni aroba skigiparangni neng·nikanirangko chel·atna gita daito gnanggiparang nirokatna nangao ga·akenga, jedakode uano poraienggipa chatro-chatrirangni nikjumanganirang cha·sotako man·jawa.
