Mawkyrwat: PHE Minister Marcuise N Marak, South West Khasi Hills-ni Mawkyrwat biapo water supply scheme ni ning·o ka·enggipa kamko nirokeaha. Indake uni nirokeanio, Wahsiej song sepango donggipa Nonglang minggipa songo kam ka·enganiko aro dam ba Sala chibima ko chichang ka·enggipa kamkoba nirokeaha.
Apsan salon Mawkyrwat-ni Circuit House conference room-o tom·aniko ong·ate chanchirimaniko dakdilanganio Swachh Bharat Mission(Gramin) aro Jal Jeevan Mission-ko namdapataniko dakna ge·gittam district rangko miksongangaha_West Khasi Hills, South West Khasi Hills, aro Eastern West Khasi Hills.
Tom·anio Minister baksa Nongstoin MLA Gabreil Wahlang, Principal Secretary of PHE Syed Md. A Razi, South West Khasi Hills-ni Deputy Commissioner B Mawlong, Mission Director Aldealyne Nikhla, PHE-ni Chief Engineer BM Lyndem aro PHE department-ni official-rang aro una agreba Mawkyrwat Divison-ni Executive Engineer K Nongbsaw- uamangba bak ra·aha.
Unbaksana tom·anio MDA sorkarini Swachh Bharat Mission(SBM) aro Jal Jeevan Mission (JJM) ko dingtang dingtang biaprangko chu·sokgipa ong·e kam ka·na ku·chakanikoba on·angaha.
Tom·a matchote kobor ra·timgiparang baksa agangrikmitingo, PHE Minister Marak, SWKH-o ka·enggipa project-ni kamrangko nirokeanio kamrangni chu·sokenganiko nike kusi ong·aniko parakaha. Aro kamko nirokenggipa officer-rangni kamna kusi ong·e, uamangna nama sikaniko on·aha.
