MANGSANG: Re·anggipa December 21 aro 22 tarikrango Garo Students Union (GSU) Mangsang Unit, Tourism department baksa nangrimenba, Rice Festival ba merongni manianiko salgnina, East Garo Hills a·jani Mangsang songo ong·atangaha.
Ia festival ba manianiko ong·atanio, East Garo Hills a·jani District Administration-ba dakchakanirangko on·aha aro ia manianio Riprap, Noga, Ahowee aro Hero Master-ni concert-koba ong·ate, manderangko an·saoatangaha.
Ia Rice festival-ko ong·atani bidingo GSU Mangsang unit-ni president Bamba Sangma talataniko on·angengon, “Mangsang-o man·gipa mirongrangara namen dingtanggipa ong·a aro ia mirongrang joltangosan ong·aigija a·song gimikon mingsing minggamako man·aha. Mangsang-o man·gipa mirongrangko gipatna miksonganiosa chinga ia festival ba manianiko ong·ataha,” ine parakataha.
Ia maniani skanggipa salo, cooking competition, buyer-seller meet, folk song competition aro Hero Master baksana Noga-ni git ring·e mesokanirangko nikangna man·aha aro gnigipa saloba jatni kal·susaanirang, jekai Wa·pong Sika, Jakpong Pe·a, An·ding Oka, Makkre Wa·jol Mala, budu salgrika aro uandakgipa kal·susaanirang baksana dingtang dingtang program-rangko ong·atangaha.
“Ia festival-ko ong·atna gita chinga November jaon administration-ni official-rang baksa chanchirimaha aro da·o ia manianiko chu·sokgipa ong·atna man·ahani gimin chinga namen kusi ong·bea. Mangsang-ni mirongrang, jolo songdongenggipa manderangni janggi tanganio dingtanganiko ra·bana man·gen aro ia mirongrangko a·gilsak gimikonan gipatna miksonganiosa chinga ia manianiko ong·ataha,” ine GSU Mangsang unit-ni general secretary Windtrue Arengh aganskaaha.
Ia bilsio ia Mangsang Rice festival-ko gnigipa changna ong·ataha aro re·baenggipa bilsioba ia manianiko dal·bate ong·atna GSU Mangsang unit ku·rachakaniko on·angaha.
Ia manianiko 2018 bilsio a·bachengahachim indiba uni ja·man COVID-19 sajinmani a·sel ong·atchipna man·jahachim.
