AMPATI: Mongolbar salo, International Day of Persons with Disabilities ba be·enni gita cholgri ong·gipa manderangni salko South West Garo Hills a·jani Rerapara C&RD Block ning·o donggipa Dobol Lake English School-o maniangaha aro ia salko manianio, South West Garo Hills a·jao donggipa dingtang dingtang biaprangoni sak 180-na baten be·enni gita cholgri ong·gipa manderang bak ra·angtokaha.
Ia program-ko Ampati-ni District Social Welfare Office ong·ataha aro ia program-ko ong·atanio, Mellim PHC-ni Senior Medical & Health Officer Dr Norimchi R Marak, mongsonggipa sokgipa ong·e bak ra·angaha.
Ia tom·anio Dr Marak, jinmana aganprakengon, an·seng baljoke dongna gita rongtal an·talaniko rakkijringchina songni nokni manderangko didiangaha.
Ia program-ko ong·atanio, Ampati DCPU-ni Legal-cum-Probation Officer Tanya Derimchi Ch Marak-ba jinmana aganprakengon, be·enni gita cholgri ong·gipa manderangna on·gimin bilrangni gimin talate on·angenba, a·gilsak gimiko be·enni gita cholgri ong·gipa manderang 16%-ni gita donga aro India a·songoba 2.2%-ni gita donga ine parakangaha.
Disability certificate-rangko ra·e, sorkarini on·enggipa dingtang dingtang namgnirangko ra·china gitaba ua, be·enni gita cholgri ong·gipa manderangna agan-ku·pattianirangko on·angaha.
Ia tom·anio, be·enni gita cholgri ong·gipa manderangoni saksa Salen Marak-ba jinmana aganprakengon, maikai be·enni gita cholgri ong·gipa manderang, kamrangko ka·e cha·na cholrangko sandianio neng·nikanirangko chagrongna nangronga, uarangni gimin talataniko on·angaha. Job Reservation Policy-o be·enni gita cholgri ong·gipa manderangnaba 4 percent-ko kanggimin donga ine be·enni gita cholgri ong·gipa manderangni neng·nikanirangko niatchina aro cholrangko on·china gitaba Marak, sorkari official-rangko didiangaha.
Ia program-o Ampati One Stop Centre-ni Case Worker Begimme G Sangma-ba jinmana aganprakengon, be·enni gita cholgri ong·gipa me·chikrang, maikai kragij dake kal·akanirangko chagrongna nangronga, uarangni gimin janapangenba, iandakgipa me·chikrangna chel·chakaniko aro mangrakbatataniko on·na nangengani gimin aganangaha.
Ia program-ko ong·atanio be·enni gita cholgri ong·gipa manderangna kal·susaanirangkoba ong·ataha aro chegiparangna boksisrangko suale on·angaha.
Tom·a a·bachengao, Ampati-ni District Social Welfare Officer Zanera Marak, rimchaksoani kattarangko aganangskaaha.
