Gital Assembly-o Autumn Session-ko ong·atskana sorkari ka·dongenga
SHILLONG: Shillong songjinmani Mawdiangdiang-o rikenggipa gital Assembly building-ko rikanio somoirang ja·manchakroroengon, ia gital Assembly building-ko matchotna gita a·dok sorkari, re·baenggipa 2025 bilsini Autumn Session-ona somoiko ra·dapangtaiaha.
Budbar salo, Meghalaya Assembly-ni Speaker Thomas A Sangma-ni dilanichi High Powered Committee (HPC)-ni tom·aniko ong·atanio, ia gital Assembly building-ko matchotna somoiko ra·dapangtaiaha.
HPC tom·a matchotani ja·man kobor ra·timgiparangna talataniko on·angengon, ia gital Assembly building-ni protchongko tarianio namen simsakna nangengani gimin kamrangko ka·sine aro simsake ka·na nangnikenba, ia gital Assembly building-ko matchotna sorkari, somoiko ra·dapna nangaha ine Assembly-ni Speaker Thomas A Sangma parakataha.
“Da·al salni bako High Powered Committee-ni chanchirimanirang namen chu·sokgipa ong·aha. Da·o dipet Assembly building-ko rikanirang chu·ongnikani gita ong·enga indiba ia gital Assembly nokni protchong namen dingtangmanchagipa ong·ani gimin mikkangchi maming a·selrang ong·taijana gita chinga simsakbate aro ka·sine kamrangko ka·na nangnikenga. Iandakgipa Assembly nok an·ching jolrango dongkuja, uni gimin chinga sikkete kamrangko ka·na man·jawa,” ine Sangma aganaha.
Ia gital Assembly noko sorkari, Budget Session-ko ong·atna miksonganirang dongachim ine janapatengon, kamrangko simsake ka·na nangengani gimin ia gital Assembly nokko matchotna gita somoiko ra·dapna nangengaha aro da·o ia gital Assembly nokko matchotahaon Autumn Session-ko ong·atskana ka·dongenga ine Assembly Speaker parakataha.
Sangma-ni aganani gitade, ia gital Assembly-ni protchongko tarianio somoiko ra·na nangengani a·selsa ia gital Assembly building-ko matchotna somoikoba ra·dapna nangenga.
Ia HPC-ni tom·anio a·dokni Chief Minister Conrad K Sangma-ba bakko ra·e ja·mano kobor ra·timgipa manderang baksa agangrikengon, batanggimin somoirango gita ia gital Assembly nokko rikanio maming a·selrang ong·taijana gita ka·sine aro simsakbate ia nokko rikna nangengani gimin sal 100 somoiko ra·dapna nangnikaha ine parakataha.
“Ia gital Assembly nokko matchotna gita HPC, sal 100 somoiko ra·dapna tik ka·ahani gimin da·o ia gital Assembly-o Budget Session-kode ong·atna man·jawaha indiba re·baenggipa 2025 bilsini Autumn Session-na skangde ia gital Assembly nokko matchotna ka·dongenga,” ine Chief Minister aganaha.
HPC-ni tom·anio dongpae bak ra·anggipa gipin manderangara, a·dokni Deputy Chief Minister aro Parliamentary Affairs Minister Prestone Tynsong, a·dokni Deputy Chief Minister aro Urban Affairs Minister Sniawbhalang Dhar aro gipinrang ong·a.