RESUBELPARA: Budbar salo, North Garo Hills a·jani Deputy Commissioner (Supply) office, Shillong-o donggipa Meghalaya State Food Commission baksa nangrime National Food Security Act (NFSA) 2013-ni bidingo skanggipa Regional Camp-ko Garo Hills region-na North Garo Hills a·jani Mendipathar Cooperative Society Hall-o ong·atangaha.
Food Security Act 2013-ni kamrangko nipiltaina miksonganio ia program-ko ong·atangaha aro ia program-o dingtang dingtang self help group (SHG)-rang, fair price shop dealer-rang, wholesaler-rang, jolni nokmarang, sordarrang aro gipinrangba bak ra·angtokaha.
Ia program-ko ong·atanio, Meghalaya Legislative Assembly-ni Deputy Speaker Timothy D Shira, jinmana aganprakangengon, Public Distribution System (PDS)-ni bidingo manderangna agan-talatanirangko on·na, NFSA-ni ning·o manderangna on·gimin bilrangni gimin aro Food Security Act 2013-ko nambate chu·sokatna ia camp-ko ong·ataha ine parakangaha.
Ia NFSA-ni ning·o Midday Meal Scheme, ICDS aro PDS-koba man·chapa ine talataniko on·angengon, ia scheme-rangko man·na nanggipa manderangna on·na gita ia scheme-rangko kakket aro bebeo chu·sokatchina Deputy Speaker didiangaha.
Ia program-ko ong·atanio, Meghalaya State Food Commission-ni Chairman PS Thangkhiew-ba saksa sokgipa ong·e jinmana aganprakengon, ia commission-ni miksongani aro niam bidikrangko agan-talate on·angaha.
Ia program-ko ong·atanio dongpae jinmana aganprakanggipa gipin manderangara, Mendipathar-ni MLA Marthon J Sangma, Kharkutta-ni MLA Rupert Momin, North Garo Hills a·jani Deputy Commissioner, AK Singh, Meghalaya State Food Commission-ni Member Dr Greenaline K Marak aro gipinrang ong·a.
