Dadenggre-o niamgri skigiparangko kamo rakkiani mamla HC-ona soka

Tura: West Garo Hills Dadenggre subdivision-o niamgri teacher ba skigipako kamo rakkiani mamlako saksa applicant Istiak Alom, December 3 tariko Meghalaya High Court-ona ra·angaha. Komibeoba sak 29 teacher-rangko niamgri kamo rakkiani gimin ja·ku de·china mol·molaha.
Dingtang dingtang university-rangoniko nokli tarigipa E.El.Ed degree-ko on·gipa teacher-rangni kosako ja·ku de·ani bidingo a·dok sorkariko sing·ani ja·man ia mamlako HC-ona ra·angaha. A·doko sorkari, nokli degree on·gipa teacher-rangko kamo rakkikuenga aro badi ka·gipana, niamgri kamo rakkiani mamlao report-ko man·aha indiba da·ode uko parakatna man·kujawa ine aganchakaha. Final ba bon·kamgipa report-ko sengkuenga ine sorkari aganaha.
Teacher -rangko kamo rakkianio niamko ja·rikja ine u·iani ja·man sakgittam memborni inquiry committee-ko songaha, ua committee, sandiani report-ko sal 25-ni gisepo on·na nangachim. Ia bilsini May ja 22 tariko sandina ge·etaha. Indiba da·onan inquiry ba am·sandiani report-ko on·kujaenga ine Alom-ni ra·gipa RTI-o janapaha.
“Sorkari, niamgri kam ka·giparangko chelchakenga, uamangni kosako maming ja·kuko de·ja. Sorkarini ja·ku de·aniko adita somoina nichake dongaha indiba maming aganchakaniko man·jani gimin chinga ia mamlako HC-ona ra·baaha ine badi ka·gipa Istiak Alom aganaha.
Ia bilsion sak 34 teacher-rangko unreserved category-o interview-ko ra·e kamo rakkiaha. Iano maming gualani dongja ine chanchiachim indiba ja·man mamlako sandiaon niam pe·aniko u·ina man·aha.
Alom, Assam education board-na RTI ka·e, Meghalaya-ni mandeko SCERT exam ba porikkana apply ka·na man·ama man·ja ine sing·aha. Jena education department man·ja ine aganchakaha. Indiba sak 12 jemangkon kamo rakkiaha uamangni on·gipa certificate-ara nokli degree-rangsa ong·a ine nikna man·aha.
“Am·sandiani report-ko sal 25-ni gisepon on·na nangachim indiba report-ko man·jani gimin anga RTI file ka·aha. Jena, aganchakanio, ‘am·sandiani report-ko man·kkujaenga uni gimin report-ko on·na man·jawa’ ine aganaha. Ja gittam ja·man RTI file ka·taioba apsankon aganaha. Indake ong·engon SCERT Assam, Assam-ni manderangsan uamangni D.El.Ed course-ko dakna man·a ine aganaha, ine Alom aganaha.
Iana Alom, Meghalaya High Court-ona mamlako segataha aro December 5 tarikon skanggipa hearing-ko ka·aha.
“Hearing ka·mitingo Court, Meghalaya aro Assam-ni respondents aro sak 12  private respondents-na notice-ko on·china ge·etaha.
Iana skangba applicant, WGH-ni dingtang dingtang police station-rangko FIR-ko segataha. Indiba mamlako sandikuenga.
Minggipin SC, teaching job ba skipani kamna jachetni D.El.Ed-ko valid degree ba kragipa degree ine ra·china ge·etani ja·manba a·dok sorkari, iani bidingo jrip dongenga, ian kamna rakkianio cha·bokani dongani chinko mesokenga.
Iarangni gisepon Dadenggre SDSEO-ni rakkigipa ge 34 post-oni ge 32 post-ni bidingoba tik ong·gijanirang donga ine Alom parakaha. Sakgni teacher-rangsan DIET Tura-o pass ka·aha, uamangko kamo rakkiaha. Saksade jean alternative English-o pass ka·ahachim indiba una Assamese-ko skinasa kamko on·aha.
Dadenggre sub division-o chu·gimik ge 192 bangbang ong·e donggipa post-rang donga, jeoni sakgni kamo rakkigipa teacher-rang re·bajaha. Ia bilsini February jao candidate-rangko kamo rakkiaha.