SHILLONG: Sixth Schedule-ko ra·gatna uamangni miksongako chu·sokatna aro NPP-ko namnikgijagipa manderang baksa kam ka·na ske aro party-o bakrimako uamang nikna sikjae watgalengama State BJP Congress-ko sing·doaha.
“Political party-chi galako man·ani gimin maming kattako agana dongja indiba jensalo Assembly-o na·simang opposition ong·a unon EC-o NPP-chi dilenggipa bakrimgipao bakrimani maia miksongani donga uni gimin manderango bang·en sing·anirang nakatenga?” State BJP chief ku·wattimgipa, Mariahom Kharkrang aganaha.
“Na·simangni miksonganiko chu·sokatana baten Sixth Schedule-ko ra·gatna miksonganiko chu·sokatna Congress jeko a·kanga ong·ode, NPP-ni obostako namnikgijagipa manderang baksa kam ka·na aro NPP-ni bak ong·ako na·simang nikna sikjae katengama” ua sing·doaha.
“Angni matchotatani namen bang·ja ja·manchakdugaani ong·a,” ua aganaha. Meja Sukrobar-o Congress’-ni sak gittam MDC-rang Khasi Hills Autonomous District Council (KHADC)-o uamangni National People’s Party-chi dilenggipa Executive Committee (EC) aro Khasi Hills Democratic Forum-na uamangni chakpaaniko watgalaha, uni gimin council-o party ge·gnini gisepo meligrikaniko bon·ataniona ra·baenga.
United Democratic Party-chi dilenggipa EC-ni be·gruani ja·mano re·anggipa bilsini June jaonin Congress EC-ni bak ong·enga.
Congress’ council-ni election ong·na adita jarang dongaiahao chakpaako watgalaha, maibakai election-o chu·sokna ka·dongsoani ramao ong·enga. Bang·a party-ni dilgiparang aro kam ka·giparang MDC-rangko bil-sasoni party-oni ong·katako nangnikenga.
