TURA: Bhutan a·songoni Bangladesh a·songona ro·ong salruraenggipa truck garirang dongimin niamna bate ro·ongrangko salengani gimin West Garo Hills a·jani police-rang, komibeoba bol 15 truck garirangko Tikrikilla police station-ni ning·o donggipa Rongsai songo champengsoaha.
Bhutan a·songoni ro·ong salgipa truck garirang, India a·songni dongimin niamrangko pe·e, ro·ongrangko salengani a·sel Garo Hills-ni rama jal·langrang nosto ka·ako man·enga aro manderangna kenchakna nangani ong·enga ine dingtang dingtang dolrang aro jolo songdongenggipa manderang badi ka·doangani ja·man, ia truck garirangko West Garo Hills a·jani police-rang, Assam aro Meghalaya a·dokni simao champengsoaha.
Koborko on·ani gitade, 3 axle truck garirango bosturangko salna gita metric ton (MT) 18-onasan on·aiachim indiba Bhutan a·songoni Bangladesh a·songona ro·ong salruraenggipa truck garirang, MT 60-70-mang ong·pile ro·ongrangko salskaengachim.
“Iandakgipa truck garirango bosturangko salna gita MT 18-onasan man·aiahachim indiba ia truck garirang, MT 60-70-mang ong·pile ro·ongrangko salenga. Ia truck garirang, dingtang dingtang toll gate-rango kajinarangko gamna nangengani a·sel noksan ong·na nangengani gimin ro·ongrangko bate salskana nangenga ine pa·sikronga indiba uamangni iandake dongimin niamko manigija ro·ong salani a·selan Hallidayganj sambao donggipa dolong be·gruna nangaha,” ine Phulbari-ni mande saksa aganaha.
Ia dolong be·ani a·selan Agia-Medhipara-Phulbari-Tura (AMPT) rama gita ma·manti bostu salruraaniko dontongatna nangaha ineba ua aganaha.
Indake ong·genchimoba, adita salrangna skangsan, AMPT rama aro Paikan-Tura-Dalu (NH-51) rama gitaba bosturangko salrurana on·taiaha aro ia truck garirang, niamrangko pe·e, ma·manti bostu aro ro·ongrangko salrurana a·bachengtaiahani gimin ia garirangni kosako manderang aro dingtang dingtang dolrang badi ka·ani ja·man, Bhutan a·songoni ro·ong salruragipa truck garirangko police-rang champengsoenba, biaptangtangona watatpilaha.
Robibar saloba ia truck garirang, AMPT rama gita niamko manigija ro·ongrangko salbana jotton ka·taiahachim indiba kobor man·soenba, police-rang, ia garirangko Rongsai sambao champengsoaha aro ia garirangko biaptangtangona watatpilaha.
Iani bidingo u·iataniko on·atengon, iandake bostu salruragipa garirangko mikrake nirikkichina gita pilak OC aro IC-rangna ge·etaniko on·atmanaha ine West Garo Hills a·jani SP Abraham T Sangma parakataha.