SHILLONG: Re·anggipa Budbar salo, University of Science & Technology Meghalaya (USTM)-ni ning·o donggipa PA Sangma International Medical College & Hospital (PIMC)-ni chatro chatrirang, free health camp ba indin sanne banne on·ani program-ko Ri Bhoi a·jani Byrnihat 12 Mile jolo donggipa Ampanggre songo ong·atangaha.
Ia health camp-ko ong·atanio dingtang dingtang doctor-rang, nurse-rang aro sanna banani kamrangko ka·gipa gipin manderang bakko ra·enba, songni nokni manderangna sanna bananirangko on·angaha aro samrangkoba indin suale on·angjolaha.
Ia free health camp-ko ong·atanio, Dr Quaser Jawed (Medicine), Dr Dubori Deka (Gynaecology), Dr Nancy Brahma (ENT) aro Dr Aslam Ali (Dermatology) baksana nurse-rang, pharmacist-rang, medical social worker-rang, PIMC ward assistant-rang aro USTM gipin official-rangba dongpae, songni nokni manderangna sanna bananirangko on·anio dakchakanirangko on·angaha.
Apsan somoion, USTM Public Relations office dolni, Ampanggre songni Nokma SD Marak aro songni gipin manderang baksa gronge golpogrikanio, songsalo skia poraniko ra·engani biaprangko namdapatna gita agantalatna gitaba chol ong·aha.
Amphanggre songo nok te 75-o songdongenggipa manderang gimik sak 600-mangni gita donga, aro ia songo skul ge·sasan dongaia jeon pre-nursery-oni class 3-ona sak 40 poraienggipa chatro chatrirang gnang ine songni Nokma SD Marak, ia skul nokko namdapatna aro mongsongbate kangal cholgri bi·sarangna lekka poraniko on·anio pilak nanga dakchakanirangko on·china mol·molangaha.