SHILLONG: Adita salrangna skang, Mawlynnong songni gilja nokona re·ange, Hindurangni aganrongbewalo ‘Jai Shri Ram’ ine a·bokahani gimin social media influencer Akash Sagar-ko a·dokni Tourism Minister Paul Lyngdoh raken jegalataha.
Iani bidingo kobor ra·timgipa manderang baksa agangrikengon, batanggimin adita bilsirangni gisepo a·song gimikon Hindurangni bilakbee kam ka·anirangko nikna man·engahani gimin ia kamara Hindurangni politics kal·aniko mesokani gitasa ong·aha ine Lyngdoh parakataha.
Ia obosta ong·aniko namen kragijani ine janapatengon, ian a·doko tom·tomani aro meli nangrime donganiko golmal ka·na gita Hindurangni dakbewalko gipatna mitam manderangni jotton ka·anisa ong·enga ine Lyngdoh aganaha.
Lyngdoh-ni aganani gitade, Kristianrangni olakkiram noko nape kragija dake mesokani aro Mawsynram-o donggipa Mawjymbuin cave-o napdrae olakkina jotton ka·anirangara a·doko dingtang dingtang toromrangni ku·mong nangrime donganiko golmal ka·na jotton ka·anisa ong·enga.
“Ia pilakan Hindurangni dakbewalko gipatna jotton ka·anisa ong·enga aro iako an·ching pilakan jegalna nangchongmota,” ine ua aganaha.
Indake ong·engon, dingtang dingtang mondoli aro ma·malrangko ba dolrangko pangnan mikrake dongchina aro sawa gilja nokrango napna kraa, uarangko name nirokchina gitaba a·dokni Tourism Minister didiataha.
Lyngdoh-ni aganani gitade, a·gilsakni gipin biaprangode gilja nokrangona re·angon, manderangko name nirikkironga aro mai bosturangko ra·bita ukoba am·sandironga.
Ia Mawlynnong gilja noko ong·gipa obostara dingtang dingtang mondolirangna mikrakatani ong·skagnok ineba ua aganaha.
Gilja nokrango napaniko champenganide sorkarini jako ong·ja indiba mondolitangtangni jakosa ong·a ine janapatengon, “Sorkarini gita chinga iandake gipin toromrangni ong·gija dakanirangko champengna kamko ka·gen,” ine Tourism Minister parakataha.