SHILLONG: Meghalaya State Investment Promotion Facilitation Act (MSIPFA) 2024-ni ning·o Invest Meghalaya Authority (IMA)-ko ra·gatanio National People’s Party (NPP)-chi dilenggipa MDA sorkario maming dongnuani kattarang dongja ine a·dokni gitcham Cabinet Minister aro Chief Minister-ni Adviser Hamletson Dohling-ba a·dok sorkarina chakpaaniko parakataha.
Iani bidingo kobor ra·timgiparangna talataniko on·angengon, IMA-ni ning·o land bank-ko bikotanichi private investor-rangna cholrangko on·ani gita ong·gen aro ian kamrangko nakatate on·anichi a·dokni dal·roroanina cholrangko on·skagen ine Dohling parakataha.
“Iani bidingo a·dok sorkari aro a·dokni Chief Minister, jinmana talatanirangko on·anggen aro IMA-ko ra·gatani bidingo dingtang dingtang political dolrang aro manderang jajrengchakaniko paraktokengani gimin talataniko on·anichi manderangni jajrengchakanirangko chel·atna dakchakgen,” ine ua aganaha.
Dohling-ni aganani gitade, IMA-ko ra·gatanichi a·dokni land tenure system-ko maming dakeba nosto ka·jawa ine a·dok sorkari talataniko on·manahachim.
MSIPFA-ni badiaba niamrangko taridapna ba namdapatna nangenga ong·ode dingtang dingtang dolrang baksa apsan chanchirimna man·gen ineba Chief Minister-ni adviser parakataha.
“MSIPFA 2024-ni bidingo maiba jajaani ba ma·sina nanganirang dongkuenga ong·ode dingtang dingtang dolrang baksa apsan tom·e chanchirimna gita sorkari kusi ong·aigen,” ine Dohling aganaha.