SHILLONG: West Jaintia Hills a·jao donggipa Chutwakhu gittimni bilsi 100 gapaniko Sukrobar salo maniangaha aro ia salko manianio, a·dokni Chief Minister Conrad K Sangma, mongsonggipa sokgipa ong·e bak ra·angaha.
Ia manianio a·dokni Chief Minister baksana Deputy Chief Minister Sniawbhalang Dhar, Jowai-ni MLA Wailadmiki Shylla, Amlarem MLA Lahkmen Rymbui, sorkari official-rang aro jolo songdongenggipa bang·bea manderangba bak ra·angtokaha.
Chutwakhu gittimni bilsi 100 gapaniko manianio a·dokni Chief Minister, jinmana aganprakangengon, bilsi 100 gapahanina Chutwakhu-o songdongenggipa manderangna an·tangni namgipa skaniko on·angenba, gittimni namroro silroroanina bang·en on·gilahani ine gittimni gitcham dilgiparangko mittelpilangaha.
“1931 bilsirangonin Chutwakhu gittimni dilgiparang, me·chikrangko songsalni namgnina kamrangko ka·dilchina gita didigiparang ong·aha aro 1934 bilsimangonin ia gittimo chadambe dolrangnaba biapko on·e da·o me·a, me·chik aro chadamberangni bakrime kamrangko ka·anichi namroro silroroaniko ra·bana man·aha,” ine Chief Minister aganaha.
Meghalaya-ni bilara a·dokni dingtang dingtang gittimrangon pangchaka ine janapatengon, dingtang dingtang a·jarango aro a·doko pilakni gitan namroro silroroaniko ra·bana man·na gita ua, gittimni manderangko, sorkari baksa bakrime kam ka·china didiangaha.
Jowai-o Meghalaya Games-ko sokachakna gita tarisamsoengahani gimin an·tangni kusi ong·aniko parakatengon, ian West Jaintia Hills a·jana gisik ra·beani somoi ong·enga ine Chief Minister parakataha.
Ia tom·bimonganio a·dokni Chief Minister, Meghalaya Games-ko sokachakna gita kamrangko ka·sona, West Jaintia Hills a·jani ning·o donggipa dol 21 sports club aro association-rangna lakprak ka·e, gimik gong lak 21-ni cheque-rangkoba suale on·angaha.
