MENDIPATHAR: Re·anggipa Mongolbar walni bako, North Garo Hills a·jani Mendipathar jolo donggipa Nolbari bazar-o, dokkan te·sako wa·al kamaha aro ia dokkanko wa·al kamanio dokkan nokgiparang maming bosturangkon man·rikjaha ine kobor on·aha.
Kobor on·timgiparangni u·iatani gitade, ia dokkanara, New Miapara songni Mahindra Rabha aro Shamali Rabha-ni dokkan ong·achim aro ia dokkano uamang, cha·anirangko palengachim.
Ia sal somoirango Magh Bihu-ko maniengani gimin Mongolbar attamo manderang, ua biapo gitrangko wate an·senge rotokengachim indiba ua somoio bijoli short ong·ani a·sel ia dokkanko wa·al kamaha ine kobor on·timgiparang u·iataha.
Ja·mano manderangni u·iataniko man·soe bakan Fire & Emergency Service-ni sipairang ua biapona re·bae wa·alko kimiteaha indiba una skangan ia dokkanko chu·gimik wa·al kamsoahani gimin dokkanni maming bosturangko man·rikjaha ine kobor on·timgiparang u·iataha.
Ia dokkanko wa·al kamanio darangba saknaanirangkode man·jaha.
Indake ong·engon, ia dokkanko wa·al kamanichi baditana kingking noksan ong·atako man·na nangaha, iako police-rang am·sandina a·bachengataha.