TURA: Meghalaya a·dokni gipin biaprango gitan Garo Hills-ni dingtang dingtang biaprangoba chang 53-gipa Meghalaya Day-ko mijal January-ni 21 tariko maniangaha.
West Garo Hills a·jao ia salko Tura-ni DC Park-o maniangaha aro ia salko manianio, West Garo Hills a·jani Deputy Commissioner Jagdish Chelani, mongsonggipa sokgipa ong·e bak ra·angaha.
Chang 53-gipa Meghalaya Day-ko manianio West Garo Hills a·jani Deputy Commissioner, jinmana aganprakengon, ia salni namgipa skaniko a·jani manderangna on·angenba, Meghalaya a·dokko man·e on·na gita krengdilgipa manderang, jekai Captain WA Sangma, BB Lyngdoh, Hopingstone Lyngdoh aro gipin dilgiparangni kamrangko gisik ra·atangaha.
Adita salrangna skang, South West Garo Hills a·jao gital kuligipa Captain Williamson Sangma State University-ni bidingo janapangengon, ian a·doko lekka poraniko tang·doatna ja·ku de·chakatani ong·aha ine Chelani aganaha.
Ia salko manianio, Tura Government College-ni ning·o donggipa History Department-ni Associate Professor Jessica A Sangma-ba jinmana aganprakengon, Assam a·dokni bak ong·engmiting somoio Meghalaya a·dokko man·chengani itihasko jinmana talate on·angaha.
Ia salko manianio, West Garo Hills a·jani Deputy Commissioner Jagdish Chelani, me·a me·chikni gisepo baseaniko bon·atna gita jinma ku·mikchetanikoba dakdilangaha.
Ia tom·bimonganio dongpae jinmana aganprakanggipa gipin manderangara, Health Service-ni gitcham Joint Director Dr Cintholina B Sangma, ADC Rojalinda D Shira, ADC Florina Boro aro gipinrang ong·a.
Apsan daken, ia chang 53-gipa Meghalaya Day-ko North Garo Hills a·jaoba, Resubelpara-ni Mini Secretariat Conference Hall-o maniangaha aro ia salko manianio, North Garo Hills a·jani Deputy Commissioner AK Singh, mongsonggipa sokgipa ong·e bak ra·angaha.
Ia tom·bimonganio North Garo Hills a·jani Deputy Commissioner, tom·anio bak ra·enggiparangna aganprakengon, Meghalaya a·dokko man·e on·dilanggipa pagitcham ma·gitchamrangna mande ra·pilskaaniko dakangenba, bilsi 53-ni gisepo Meghalaya a·dokni dal·rorobaani aro namroro silrorobaaniko jinmana talate on·angaha. Mikkangchi a·dokko namroro silroroatangkuna kam ka·anio pilakkon ku·cholsan ong·e bakrimchina gitaba ua didiangaha.
Ia salko manianio, dingtang dingtang kamrangchi North Garo Hills a·jana aro Meghalaya a·dok gimikna mikkim rasongko ra·baahani gimin Riprap dolni singer Browny R Marak, ba·ra dokanina mingsinggipa Rajmita Rabha, Mid Level Health Provider (MLHP) Dafiralyn M Diengdoh, Meghalaya Under-19-o cricket kal·gipa me·chik Julitha Sangma aro mingsinggipa gitcham singer Hamilton Momin sagina mande ra·pilskaani chin gita certificate-rangkoba on·angaha.
Indake ong·engon, ia chang 53-gipa Meghalaya Day-ko South West Garo Hills a·jaoba dingtang dingtang program-rangko ong·ate maniangaha.
Ia salko maniani bak gita South West Garo Hills a·jao, Meghalaya Day Run, bol ge·ani program aro jinma tom·ani program-koba ong·atangaha.
Jinma tom·aniko ong·atanio, South West Garo Hills a·jani Deputy Commissioner Hema Nayak, mongsonggipa sokgipa ong·e jinmana aganprakengon, Meghalaya a·doko songdongenggipa dingtang dingtang jatrangni daka rikani aro meli-nangrime dongani gimin janapangenba, a·doko songdongenggipa manderangan a·dokni gamchatbatsranggipa gam-jin ong·a ine parakangaha.
South West Garo Hills a·jao dingtang dingtang department-rangni chu·sokatgipa kamrang aro chagrongna nangenggipa neng·nikanirangkoba ia tom·anio DC jinmana agan-talate on·angaha.
Lekka pora aro an·seng baljokani kamrango gisik on·bate South West Garo Hills a·jao namroro silroroaniko ra·bana gita pilak official-rangko aro a·jao songdongenggipa manderangkoba bakrime kamrangko ka·china Nayak didiangaha.
Ia tom·anio dongpae jinmana aganprakanggipa manderangara, SWGH a·jani Additional Deputy Commissioner RZD Shira aro gipinrang ong·a.
Pringni bako dingtangmancha Meghalaya Day Run-ko ong·atangaha aro ia katsusaanio chegiparanga, me·asarangni category-o skanggipa Bongoara songni Kanen M Sangma, gnigipa Malpara songni Bhishmadev Hajong aro gittamgipa Rangsakona songni Laichang T Sangma ong·a. Me·chikrangni katsusaanio chegiparanga, skanggipa Chegitchakgre songni Ringsechimik G Sangma, gnigipa Janghapara songni Bendera B Marak aro gittamgipa Bolchugre songni Rikme K Marak ong·a.
